Astana joldaryndaǵy keptelisti sheshý úshin 2 kópir salynady
«Qalada kólik keptelisi áli de ózekti. Ásirese, Máńgilik el dańǵyly boıynda, atap aıtqanda Mınıstrlikter úıi men Ulttyq bank aralyǵynda. Buryn jarty saǵattap tursaq, qazir 1,5 saǵatqa deıin sozylady. Máńgilik el dańǵylymen qatar ornalasqan Á.Bókeıhanov kóshesinde de jaǵdaı máz emes, jóndeý kerek. Osy máseleler qalaı sheshilmek?» - dep qalalyq máslıhattyń depýtaty Nurdáýlet Orazhanov saýal joldaǵan.
Depýtat saýalyna qalalyq kólik jáne jol-kólik ınfraqurylymyn damytý basqarmasynyń basshysy Jansultan Saparbaev jaýap berdi.
«Jalpy sol jaǵalaýdaǵy keptelis máselesin sheshý úshin qosymsha eki kópir salý qajet. Alǵashqysy – Táýelsizdik, ekinshi kópir – Uly dala dańǵylynda. Búginde Táýelsizdik dańǵylyndaǵy kópir qurylysynyń montajdaý jumysy bastaldy. Respýblıkalyq bıýdjetten qarjy kútip otyrmyz. Kópir qurylysy úshin 7 mlrd teńgege jýyq qarajat kerek. Uly dala boıynda salynatyn kópir boıynsha merdiger kompanııa anyqtaldy. Ol jerde jumys búgin bastalady. Kópirdi qala kúnine oraı qoldanysqa berýge tyrysamyz. 2 kópir iske qosylǵannan keıin Máńgilik el, Turan, Qabanbaı batyr dańǵyldarynyń boıyndaǵy keptelis rettelýi tıis», - deıdi ol.
Odan bólek, basqarma basshysynyń aıtýynsha, Buqar jyraý kóshesindegi byltyr bastalǵan kópir bıyl paıdalanýǵa berilmek.
Taıaýda ǵana elorda kóshesindegi asfalttyń opyrylǵanyn habarlaǵan edik.