Astana joldarynda qatty aıdaǵan avtobýs júrgizýshisin kýáliginen aıyrmaq
ASTANA. QazAqparat - Astananyń avtojolynda jarys uıymdastyryp, ushyrtyp aıdaǵan №38 baǵdardyń jolaýshylar avtobýsynyń júrgizýshisi kólik basqarý kýáliginen aıyrylýy múmkin, dep habarlady elordanyń ІІD ákimshilik polıtsııasy basqarmasynyń baspasóz qyzmeti.
«№4 avtobýs parki» JShS ıeligindegi №38 baǵdardyń avtobýs júrgizýshisine qatysty apattyq jaǵdaı týǵyzǵany úshin Astana qalasynyń ІІD qyzmetkerleri «Ákimshilik quqyq buzýshylyq týraly» QR Kodeksi 2-bóliminiń 465-babyna sáıkes avtokólik basqarý quqyǵynan 6 aıǵa deıin aıyrýdy kózdeıtin ákimshilik hattama toltyrdy. Materıaldar Astana qalasy mamandandyrylǵan aýdanaralyq sotyna protsessýaldyq sheshim qabyldaý úshin jiberildi», - dep atap ótilgen ІІD baspasóz baıanynda.
Avtopark basshylyǵy 23 jastaǵy avtobýs júrgizýshisiniń áreketin tártiptik keńeste qaramaqshy.
Eske sala keteıik, Astanada 4 qyrkúıekte saǵat 14:25 shamasynda №38 baǵdardyń avtobýsy Ýálıhanov kóshesimen qatty júrip bara jatyp, Baraev pen Kenesary kósheleri arasynda №103 baǵyttaǵy avtobýsqa apattyq jaǵdaı týǵyzdy. Tejegishti shuǵyl iske qosýynan keıbir jolaýshylar qulap ketti. QazAqparat tilshisi bul oqıǵanyń kýágeri bolyp, saıtqa aqparat shyǵardy.
