«Astana jolbarystary» Qazaqstan kýbogynyń jeńimpazy atandy
ALMATY. Qazannyń 4-i. QazAqparat /Erlik Erjanuly/ - Kókshetaýda qyrkúıektiń 26-sy men qazannyń 1-i aralyǵynda basketboldan Qazaqstan kýbogy sarapqa salynǵan edi.
Onda Astana qalasynyń «Jolbarystary» aqtyq synda Pavlodardyń «Ertisinen» basym túsip, óz tarıhynda úshinshi ret jeńimpaz atandy.
Byltyr jeltoqsannyń 7-11-i kúnderi Qostanaıda ótken dodada pavlodarlyqtarǵa ese jibergen astanalyqtar bıyl qarsylasyn iri eseppen (73:46) utty. Klýb dırektory Valerıan Koptelovtyń aıtýynsha, bul «Jolbarystar» buǵan deıin birde-bir ret «Ertis» basketbolshylaryn mundaı úlken eseppen jeńip kórmegen bolatyn. Olar bıyl Qazaqstan kýbogy jarysyndaǵy barlyq oıyndy óz paıdasyna sheshti. Jarys qorytyndysynda komanda kapıtany Anastasııa Alıshaýskaıte Qazaqstan kýbogynyń úzdik oıynshysy, Vıktorııa Pazıýk úzdik shabýylshy retinde tanyldy. Al asa tartysty ótken bul saıysta úshinshi oryn úshin bolǵan oıynda kókshelikterdiń «Oqjetpesi» almatylyqtardy qapy qaldyrdy.
