Astana - joǵary bilimdi adamdardyń ósip kele jatqan aglomeratsııasy - N.Nazarbaev

«15 jyldyń ishinde astanalyq sotsıým tanymastaı ózgerdi. Bıyl Astana halqynyń sany 15 jyldyń ishinde 4 esege jýyq ósip, 800 myńǵa jetti. Astananyń bas josparyn ázirleý barysynda 2030 jylǵa taman bizge elorda jobasyn qandaı adamdar sanymen josparlaý kerek degen máselede mamandar arasynda talas týyndaǵany meniń esimde. Sheteldik keńesshilerdiń pikir­leri ekige jaryldy. Eýropa mamandary óz ádisterin qoldana otyryp, joǵarydaǵy merzimge taman Astana halqynyń sany 650 myń turǵyndy quraıtyndyǵyn eseptep shyqty. Olardyń japondyq áriptesteri sol tusta Astanada 800 myń adam ómir súredi degen qorytyndyǵa keldi. Qazaqstandyq demograftar esebi 1,5 mıllıon adamdy kórsetti. Sóıtip, 800 myń turǵyn tsıfryna taban tiredik. Biraq qazir shyndyqqa bizdiń otandyq ma­man­dardyń neǵurlym jaqyn kelgendi­gin kórip otyrmyz. Óıtkeni, 800 myńdyq kórsetkishke biz 30 jylda emes, nebári 15 jyldyń ishinde jettik»,- dep jazady Memleket basshysy.

Elbasynyń atap ótýinshe, Astana - joǵary bilimdi adamdardyń ósip kele jatqan aglomeratsııasy. Jalpy bilim beretin oqý oryndarynyń elordalyq jelisi qazir 70 memlekettik jáne 12 memlekettik emes mektepterdi, 78 memlekettik jáne 60 memlekettik emes mektepke deıingi mekemelerdi quraıdy. 15 jyldyń ishinde elordada 33 jańa mektep, 40 balalar baqshasy men 22 shaǵyn ortalyq salyndy. 35 tehnıkalyq jáne kásiptik bilim berý kolledjinde 31 myńǵa tarta oqýshy bilim alýda. Bul búkil Qazaqstan úshin ınnovatsııalyq túrdegi jańa óndiristerdiń alǵy shebindegiler bolmaq. Astana jańa ekonomıkasynyń damýy qala halqyn eńbekpen qamtý qurylym­darynyń ózgerýine úlken yqpal jasady. Halyqtyń úlken bóligi memlekettik basqarý, qyzmet kórsetý salalarynda eńbek etýde. Astanalyqtardyń 60 paıyzdan astamy shaǵyn jáne orta bıznes salasynda.