Astana jylytý maýsymyna 90 paıyz daıyn

ASTANA. KAZINFORM – Elordada jylytý maýsymyna qyzý daıyndyq júrip jatyr.

Búgin Astana qalasynyń qoǵamdyq keńes otyrysynda elordanyń aldaǵy jylytý maýsymyna daıyndyq barysy pysyqtaldy.

- Jylý berýge 90 paıyz daıynbyz. Keıbir jumys kestege sáıkes, qazan aıynyń sońyna deıin aıaqtalady. Biraq, jylytý maýsymyna keri áserin tıgizbeıdi, sebebi eń sýyq kezeń qarasha men jeltoqsan aıyna keledi. Sol sebepti jumys belgilengen kestege sáıkes júrgiziledi, - dedi Astana qalasynyń Energetıka basqarmasy basshynyń orynbasary Maqsat Esmaǵulov.

Onyń aıtýynsha, qalada qystygúni apat jıi bolatyn jeti ýchaske bar.

- Bıyl bárin anyqtap, jasap qoıdyq. Sonymen qatar atalǵan ýchaskelerdi jaı ǵana jamap qoıǵan bolmaıdy ǵoı, sondyqtan jobalaý jumystary bastaldy. 2026 jyly atalǵan ýchaskelerdi aýystyratyn bolamyz, - deıdi ol.

Birer kún buryn Úkimettik jumys toptary óńirlerdiń jylytý maýsymyna daıyndyǵyn tekserýge kiristi. 

Sondaı-aq Premer-mınıstr Oljas Bektenov jylý berý maýsymyna daıyndyǵy tómen óńirlerdi synady.