Astana jylyna 6 mln týrıst qabyldaı alady
ASTANA. KAZINFORM – Astanaǵa keletin týrıster sany qalanyń áleýetine áli saı emes. Elorda jylyna 4–6 mln týrıst qabyldaı alady. Bul týraly «Future of Mobility» JShS-niń damý jónindegi dırektory Ulybek Qımanov málimdedi.
Qoǵamdyq tyńdaýdy Astana qalasy máslıhatynyń bıýdjet, ekonomıka, ónerkásip jáne kásipkerlik máseleleri jónindegi turaqty komıssııasy ótkizdi. Jıynda týrızm salasyn úılestirý jáne elordaǵa keletin sheteldik týrıster sanyn arttyrý máseleleri qaraldy.
Astananyń týrızm salasyn damytý strategııasyn ázirleýdiń aralyq nátıjelerin tanystyrǵan Ulybek Qımanov elordanyń týrıstik áleýeti uqsas birqatar qaladan áli de keıin qalyp otyrǵanyn aıtty.
Astananyń týrızm salasyn damytý strategııasyn ázirleýdiń aralyq nátıjelerin tanystyrǵan Ulybek Qımanov elordanyń týrıstik áleýeti uqsas birqatar qaladan keı kórsetkish boıynsha keıin qalyp otyrǵanyn atap ótti.
Zertteý barysynda Astana Tashkent, Baký, Qazan, Varshava, Er-Rııad jáne basqa da qalalarmen salystyrylǵan. Sarapshylar qala halqy men týrıster sanynyń araqatynasyna da nazar aýdarǵan.
– Qazirgi týrıstik aǵyn Astananyń áleýetin tolyq ashyp otyrǵan joq. Búginde qalaǵa jylyna shamamen 1,6 mln týrıst keledi, onyń 400 myńy – sheteldik qonaqtar. Biz salystyrǵan qalalardyń ortasha kórsetkishine súıensek, Astanaǵa keletin týrıster sanyn jylyna 4–6 mln adamǵa deıin arttyrýǵa múmkindik bar. Al sheteldik týrısterdiń úlesi qazirgi 24%-dan 35%-ǵa deıin ósse, olardyń sany 1,5–2 mln adamǵa jetýi múmkin, – dedi Ulybek Qımanov.
Onyń aıtýynsha, halyqaralyq áýe qatynasy jaǵynan Astana salystyrylǵan qalalardan tómen kórsetkishke ıe. Qazir elordadan 22 memleketke áýe reısi oryndalady. Al Tashkentten 37, Bakýden 32 elge ushýǵa bolady.
Qalalar sany boıynsha da aıyrmashylyq bar. Astanadan 41 qalaǵa reıs qatynasa, Tashkentten 85, Bakýden 69 qalaǵa áýe qatynasy bar.
Ulybek Qımanovtyń sózinshe, qazirgi týrıstik aǵyndy qabyldaýǵa Astanadaǵy tórt jáne bes juldyzdy qonaqúıler men qoǵamdyq tamaqtaný oryndarynyń sany jetkilikti. Alaıda týrıster sany artsa, aldaǵy bes jylda bul ınfraqurylym jetkiliksiz bolýy múmkin.
Sondaı-aq Astanany týrıstik baǵyt retinde damytýdyń úsh negizgi tujyrymdamasy usynylǵan. Olar – «Astana – bolashaq qalasy», «Astana – iri oqıǵalar astanasy» jáne «Astana – mádenıet pen tabıǵat toǵysqan qala».
– Osy baǵyttardy damytý aıasynda birqatar jańa nysan men joba usynylyp otyr. Olardyń qatarynda kıbersport ortalyǵy, tsıfrlyq park, zamanaýı óner ortalyǵy, jańa kórme kesheni, 50 myńnan astam kórermenge arnalǵan stadıon, jańa áýejaı, etnoortalyq jáne gastronomııalyq kóshe bar, – dedi ol.
Buǵan deıin Astanada batpaqty jerdiń ornyna 4 mlrd teńgege ekosaıabaq salynǵanyn jazdyq.
