Astana – Jezqazǵan baǵytyndaǵy poıyzda sábı dúnıege keldi
ASTANA. KAZINFORM – 27 mamyr kúni tańerteń «Astana – Jezqazǵan» baǵytynda sapar shekken №66 jolaýshylar poıyzynda qyz bala dúnıege keldi. Bul týraly «Jolaýshylar tasymaly» AQ baspasóz qyzmeti málimdedi.
— Júktiliginiń sońǵy kezeńinde bolǵan jolaýshy Alvına Pernabaeva sapar kezinde tolǵaq bastalǵanyn sezip, jolserikterden jedel kómek surady. Poıyz bastyǵy Kıikbaı Mahanov pen vagon jolserigi Altynaı Ǵafıýllına shuǵyl túrde áreket etip, bosanýǵa qolaıly jaǵdaı jasaý úshin qyzmettik nusqaýlyqqa saı barlyq qajetti sharalardy qabyldady, — delingen habarlamada.
Sonymen qatar, kómekke Sátpaev qalasynan shyqqan feldsher men balabaqshada jumys isteıtin jolaýshylar da atsalysty. Poıyz brıgadasy men jolaýshylardyń úılesimdi áreketiniń nátıjesinde 06:20–de qyz bala dúnıege aman-esen keldi.
— Jeńis stantsııasyna jedel járdem toby aldyn ala shaqyrylyp, poıyz kelgen bette ana men jańa týǵan sábı medıtsınalyq baqylaýǵa alyndy. Jańa týǵan sábıdiń ákesi Alıhan Janalın der kezinde kómek kórsetken barlyq azamattarǵa shyn júrekten alǵys bildirdi. Ol sondaı-aq, dúnıege kelgen qyzyna Asylym esimi berilgenin qýana habarlady, - dep jazdy «Jolaýshylar tasymaly» AQ baspasóz qyzmeti.
Aıta keteıik, poıyz brıgadalarynyń qyzmetkerleri únemi alǵashqy medıtsınalyq kómek kórsetý jáne tótenshe jaǵdaılarda áreket etý boıynsha arnaıy daıyndyqtan ótedi. Sońǵy 3 jyl ishinde «Jolaýshylar tasymaly» AQ poıyzdarynda 15 sábı dúnıege kelgen.
Eske sala keteıik, bıyl jazda Balqash kýrorttyq aımaǵyna qosymsha poıyzdar qatynaıdy.