«Astana-Jezqazǵan» baǵytynda ushatyn reıs toqtatyldy

Elordadaǵy qolaısyz aýa raıyna baılanysty IQ389 «Astana-Jezqazǵan» baǵytynda ushatyn reıs toqtatyldy, dep habarlaıdy Azamattyq avıatsııa komıtetiniń baspasóz qyzmeti. 

Elordada 10 qańtarda qolaısyz aýa raıy ornady. Búgin jaýǵan qalyń qar men qatty jel áýe tasymalyna da óz yqpalyn tıgizdi.

Áýeaılaq qyzmeti 14:00–20:00 aralyǵynda jeldiń jyldamdyǵy 22 m/s-dan 27 m/s deıin jetýi múmkindigi týraly habarlama aldy. Mundaı aýa raıynda avıatsııalyq qaýipsizdik maqsatynda avıakompanııalardyń sheshimimen áýe reısteri toqtatylýy nemese keshiktirilýi múmkin.

Dál qazir áýejaıdyń áýeaılaǵynda qatty jel soǵýda, onyń jyldamdyǵy 11 m/s, ekpini 16m/s.

Búgin elorda áýejaıynda 75 reıs josparlanǵan bolatyn. Onyń 12 reısi (4 ushatyn, 8 ushyp keletin) ushaqtyń kesh kelýine baılanysty keshikti. Elordadaǵy qolaısyz aýa raıyna baılanysty IQ389 Astana-Jezqazǵan baǵytynda ushatyn reıs toqtatyldy.

Áýeaılaqty qalyń qardan tazalaý jumystary úzdiksiz júrip jatyr. Qazir bul jumystarǵa 10 arnaıy tehnıka jumyldyrylǵan.

Reıster týraly aqparatty Astana halyqaralyq áýejaıynyń resmı saıtynan nn-airport.kz qaraýǵa bolady. Sondaı-aq elorda áýejaıynda táýlik boıy baılanys ortalyǵy 8(7172)702-999