Astana Jer qatynastary jónindegi basqarmasynyń málimetteri boıynsha, basty qalamyzda jeke turǵyn úı qurylysyna ruqsat alý úshin kezekte turǵandar tizimine 78 451 azamattyń ótinishi tirkelgen

Kezekke turý esebi Úkimettiń 2006 jylǵy tamyzdyń 1-indegi №726 qaýlysymen bekitilgen Ereje talaptaryna saı jáne azamattar ótinishteriniń kelip túsken kúnderi, sondaı-aq olardy Astana qalasy ákimshiligi keńsesinde tirkelýi boıynsha qatań júrgiziledi, dep habarlaıdy Astana qalasy ákiminiń baspasóz hatshysy A. Aspandııarova.

Baspasóz hatshysy atap kórsetkendeı, dúısenbide, sáýirdiń 19-ynda QR Jer resýrstaryn basqarý agenttigi (JRBA) tóraǵasynyń orynbasary K. Raıymbekovtyń online-konferentsııada «ústimizdegi jyly Astanada jeke úı qurylysy maqsatynda alty myńdaı jer ýchaskesi bólinetini» týraly aıtqany shyndyqqa jatpaıdy. Baspasóz hatshysy habarlaǵandaı, bul aqparat «qalalyq ákimshiliktiń tıisti aqparatyn tekserýsiz, 2008 jylǵy málimetterge negizdelgen».

Osy habarlamada sondaı-aq 2010 jylǵy naýryzdyń 1-indegi jaǵdaıǵa sáıkes Astana boıynsha jeke úı qurylysy úshin jer ýchaskelerin alýǵa 76,5 myń azamattardyń ótinishteri tirkelgen dep atalady, bul da - durys emes.

«Alda berilýge tıis alty myń jer ýchaskesi jáne azamattardyń tirkelgen ótinishteriniń sanyna qatysty da aıtylǵan aqparat (online-konferentsııasy barysyndaǵy - redaktsııa eskertpesi) aqıqat emes jáne Astana qalasynyń ákimshiligine qatysty ádepti emes», - dep atap kórsetti baspasóz hatshysy.