«Astana» jeńilisten qorqyp emes, jankúıerlerin qýanta almaımyz ba dep qobaljydy - S.Stoılov
ASTANA. QazAqparat - Óz alańynda Túrkııanyń "Galatasaraı" fýtbol komandasyn qabyldaǵan "Astana" fýtbol klýbynyń bas bapkeri Stanımır Stoılov matchtan keıin jýrnalıster aldyna shyǵyp, baspasóz məslıhatyn ótkizdi. Birinshi taımdy jeńilispen aıaqtaǵan "Astana" ekinshi taımda shabýyldy údetip, qorytyndy esepti 2:2-ge jetkizdi. Bas bapker Stanımır Stoılov "tepe-teń oıynǵa kóńilim tolady, biraq bul esep meni qatty qýantqan joq", - deıdi.
"Qorytyndy esepke kóńilim tolady, biraq, bul nətıje meni qýantyp otyrǵan joq. Sebebi, biz búgin qarsylastan basym túsýimiz kerek edik. Biraq, birinshi taım boıy "Astana" oıynshylary sasqalaqtap, qysylyp-qymtyryldy. Ekinshi taım bizdiń paıdamyzǵa sheshildi, gol salatyn sətter kóp boldy ", - deıdi S.Stoılov. Bas bapkerdiń aıtýynsha, úzilis kezinde ol qol astyndaǵy fýtbolshylarǵa "ÝEFA-da emes, Qazaqstan chempıonatynda oınap jatqandaı júrińder" dep aqyl aıtypty. "Úzilis kezinde oıynshylarymdy tynyshtandyrýǵa tyrystym, olardyń júıkeleri syr beredi. Ekinshi taım bastalar aldynda "ÝEFA Chempıondar Lıgasynda emes, Qazaqstannyń chempıonatynda oınap júrgendeı bolyńdar. Ózderińdi erkin ustap, qalaı oınaı alatynymyzdy kórsetińder" dedim. Biraq, "Astana" jeńilip qalamyn dep qoryqqannan emes, jankúıerlerdi qýanta almaı qalamyz ba degen oıdan qobaljydy",-deıdi S.Stoılov. Aıta keteıik, ÝEFA Chempıondar Lıgasynyń "S" tobynda oınap jatqan "Astana" fýtbol klýby búgin óz alańynda birinshi matchyn ótkizip, "Galatasaraı" komandasymen teń tústi. Qorytyndy esep 2:2.
