Astana jeńil relsti tramvaılardan bas tartty
ASTANA. 27 jeltoqsan. QazAqparat - Elorda ákimi qalada jeńil relsti tramvaılardy iske qospaý týraly sheshimdi qabyldady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Astana qalasynyń ákimi Imanǵalı Tasmaǵambetov málim etti.
Aıta keteıik, atalǵan kóliktiń jobasyn halyqaralyq qarjylyq uıymdardyń zaımdary esebinen júzege asyrý josparlanǵan bolatyn. Sondaı-aq Azııa damý banki arqyly qarjylandyrý nusqasy da qaralǵan edi.
«Bank ekonomıkalyq jáne áleýmettik paıdanyń barsha paketin saraptamadan ótkizip, jobanyń shamadan tys qymbattylyǵy týraly sheshim shyǵardy. Osy oraıda onyń ekonomıkalyq tıimsizdigi eskerildi. Jalpy, osyndaı pikirmen kelisemiz»,- dep toqtaldy ákim.
Onyń aıtýynsha, jeńil relsti tramvaıdyń alǵashqy jelisiniń qurylysyna, ıaǵnı 21 shaqyrymyna 250 mıllıard teńgege jýyq qarjy qajet bolsa, dál osy aralyqqa arnaıy bólingen jolaq boıynsha júrdek avtobýs baılanystaryn jiberýge 85 mıllıard teńge kerek eken.
«Osyny salystyrsaq, bul eki joba qunynyń aıyrmashylyǵy 151 mıllıard teńge kóleminde. Sondyqtan da alǵashqy jelisi 2016 jyly aıaqtalatyn júrdek avtobýs jobasyn júzege asyrýdyń kelisilgen sheshimi qabyldandy»,-dedi qala basshysy.
Bul joba aıasynda 63 shaqyrym jol elordanyń Sol jaǵalaýy men Oń jaǵalaýyn qamtýǵa múmkindik beredi.
«Osy arqyly biz jolaýshylardyń aýqymdy bóliginiń qoǵamdyq kólikke otyrýyn qamtamasyz etip, kólik qozǵalysyn uıymdastyrýdy jaqsarta alamyz»,-dep túıdi ákim.
