«Astana jastary» resýrstyq ortalyǵy jumysqa ornalasýǵa kómektesedi

ASTANA. QazAqparat - Elordada jastar arasynda jumyssyzdyqty tómendetý, jumysqa ornalastyrý jáne kásiptik baǵdar berý boıynsha jumystar belsendi júrgizilip jatyr. Bıyl «Astana jastary» resýrstyq ortalyǵy 2500 adamdy qamtyǵan 8 shara ótkizdi.

Ortalyq qyzmetiniń mańyzdy baǵyttarynyń biri jumysqa ornalasý kezinde ishki tosqaýyldardy eńserý, kommýnıkatsııa mashyqtaryn alý jáne suhbattarda ózin-ózi tanystyrý boıynsha trenıngter ótkizý bolyp tabylady. Trenıngter 2015 jyldan beri aı saıyn uıymdastyrylyp keledi, jalpy, 450 adam oqytyldy.

Ústimizdegi jyly profıldi bos oryndar jármeńkelerin ótkizý týraly sheshim qabyldandy. L.N. Gýmılev atyndaǵy Eýrazııa ulttyq ýnıversıtetinde ótken tehnıkalyq profıldegi alǵashqy jármeńkede 18 adam turaqty jumysqa ornalastyryldy. Sonymen qatar, M. Ótemisov atyndaǵy Oqýshylar saraıynda gýmanıtarlyq baǵyttaǵy bos oryndar jármeńkesi uıymdastyryldy. Shara qorytyndysy boıynsha 15 elordalyq jumyspen qamtyldy. Jaqynda saýda-ekonomıkalyq profıldegi bos oryndar jármeńkesi ótti. Mundaı sharalardy jyl sońyna deıin ótkizý josparlanǵan.

Qazirgi kezde «Astana jastarynda» tirkelgen jumys izdeýshiler sany 385 adamdy quraıdy, 71 adam jumysqa ornalastyryldy, dep habarlaıdy elorda ákimdiginiń resmı saıty.

Aıta keteıik, ortalyqta quqyqtyq kómek te kórsetiledi. Jyl basynan beri 90 adamǵa konsýltatsııa berildi, sonyń ishinde 50% stýdentter, 15% oqýshylar, sondaı-aq, 35% jeke tulǵalar. Negizinen, adamdar eńbek qatynastary, otbasylyq jáne azamattyq quqyq, sondaı-aq turǵyn úı alý baǵdarlamalaryna qatysty máseleler boıynsha júginedi.