Astana jastary názik jandarǵa kontsertke tegin bılet taratty
ASTANA. QazAqparat - Astana qalasy ákimdiginiń qoǵamdyq damý isteri basqarmasyna qarasty «Astana jastary» KMM qyzmetkerleri men eriktiler elordada názik jandarǵa gúl shoqtary men tegin kontsert bıletterin taratty, dep habarlaıdy QazAqparat tilshisi.
Halyqaralyq áıelder kúni qarsańynda elorda jastary názik jandarǵa degen qurmetin bildirip otyr. Kóshede birneshe jas óren erteńgi mereke ıelerine tegin kontsert bıletterin taratty. Qushaq-qushaq gúl shoqtaryn syıǵa tartqan jastardyń bul syıyna alǵys aıtyp jatqandar mol.
«Shynynda da, kóktemniń kelýiniń ózi bir mereke ǵoı. Áıelder kúni qarsańynda osyndaı qurmet kórip jatqanymyzǵa qýanyshtymyz. Syı-qurmetin aıamaǵan jastarǵa myń da bir rahmet», - deıdi qala turǵyny Aıda Ospanova.
Astana jastary bir ǵana aýdanmen shektelmeı, qalanyń úsh-tórt núktesinde osylaı tegin bılet taratty. 
«Qulpyryp júrsin degen nıetpen názik jandarǵa gúl taratyp júrgen jaıymyz bar. Odan bólek, erteń Astanada ótetin kontsertke bıletter taratylyp jatyr. Bizdiń maqsat - astanalyqtarǵa merekelik kóńil-kúı syılaý. Jastar jylynyń aıasynda barlyq óńirlerdegi jas órenderge osy estafetany joldap otyrmyz. Analarymyz men ápkelerimizdi, názik jandardy qýanta aldyq degen úmittemiz», - deıdi Astana qalasy ákimdiginiń qoǵamdyq damý isteri basqarmasynyń bas mamany Aqulan Tastemir.
