Astana jastar teatry Ońtústik Koreıada óner kórsetedi
ASTANA. QazAqparat - Astana jastar teatry Ońtústik Koreıada óner kórsetedi. Bul jaıynda búgin atalǵan teatrdyń «Qyz Jibek» mıýzıkliniń premerasyna arnalǵan baspasóz máslıhatynda belgili boldy, dep habarlaıdy QazAqparat.
«Búgin biz úshin erekshe. Nege deseńizder bul - teatrymyzdyń bıylǵy jylǵy alǵashqy premerasy. Árıne, qazir Astana qalasynda mádenıet baǵytynda kóptegen jumys jasalyp jatyr. Qalamyzdyń 20 jyldyǵy, rýhanı jańǵyrý baǵdarlamasy qolǵa alyndy. Sondyqtan búgingi premeramyzdy Astana qalasynyń 20 jyldyq mereıtoıyna tartý dep bilińizder», - dedi baspasóz máslıhatynda atalǵan teatrdyń dırektory Ernar Jumataev.
Sonymen qatar ol Astana jastar teatrynyń aldaǵy ýaqyttaǵy josparlarymen de bólisti.
«Qazirgi ýaqytta bizge shetelden de kóp shaqyrý túsip jatyr. Óıtkeni, ujymyz Ortalyq Azııa elderine tanymal. Teatrymyz qurylǵan 10 jyldyń ishinde Orta Azııa elderi teatrlary arasynda ótken festıvalde 10 márte bas júlde aldy desem, artyq aıtqandyq emes. Endigi kezekte Eýropa elderine baryp, óz ónerimizdi pash etkimiz keledi. Máselen, búgin elorda jurtshylyǵy tamashalaıtyn «Qyz Jibek» mıýzıkline de suranys túsip jatyr. Ońtústik Koreıa barlyq shyǵyndy ózderi kóterip, tek osy mıýzıkldi qoıyp berseńizder, dep otyr. Qazir teatrymyz osyndaı suranysqa ıe. Bıyl da Orta Azııa elderiniń festıvaline qatysý josparymyz bar», - dedi Ernar Jumataev.
