Astana jastar teatry «Qyz Jibek» operasyn jańa qyrynan usyndy
ASTANA. QazAqparat - Elordanyń jastar teatry kórermen nazaryna Ǵabıt Músirepovtiń «Qyz Jibek» mıýzıklin kórermen nazaryna usyndy, dep habarlaıdy QazAqparat.
Qoıylym aldynda arnaıy baspasóz máslıhaty uıymdastyryp, onda Astana jastar teatrynyń kórkemdik jetekshisi, bas rejısseri Nurqanat Jaqypbaı qoıylym jaıynda keńinen áńgilemep berdi.
«Qazaq ónerindegi shoqtyǵy bıik shyǵarmanyń biri - «Qyz Jibek». «Qyz Jibek» dese qazaqtyń ısi ańqıdy. Osydan birneshe jyl buryn atalǵan shyǵarma tek operanyń tóńireginde qalyp qoımasa eken, zamanaýı tilde sóıletsek degen oı týdy. Osydan 5-6 jyl buryn Júrgenov atyndaǵy Óner akademııasyndaǵy sheberhanamda «Qyz Jibek» shyǵarmasyna baılanysty dıplomdyq jumys qorǵap, ary qaraı damytsa degen armanym da boldy. Sodan ánshi, kompozıtor Erbolat Qudaıbergenovke bul shyǵarmany rok-opera ne mıýzıkl janrynda damytýǵa qolqa saldym. Ol bir jyl boıy jastarǵa arnalǵan nusqasyn jasap shyǵardy», - dedi ol.
Onyń aıtýynsha, Erbolat Qudaıbergenovtiń jazyp shyqqan nusqasy Óner akademııasynda dıplomdyq jumys retinde qoıylǵan. Alaıda teatrǵa qoıýǵa jetispeıtin dúnıeleri bolǵan.
«Osydan keıin teatrymyzdyń mýzykalyq árleýshisi, akter Jandáýlet Bataı mıýzıklge qazaqtyń dombyra, sherter syndy aspaptaryn qosyp, folk-rok janryna beıimdep shyǵardy. Unady, qulaqqa jaǵymdy estildi. Sodan turyp qalǵan jumysymyzdy bıyl qaıta qolǵa alyp, endi mine búgin premerasy», - dedi Nurqanat Jaqypbaı.
Aıta keteıik, Jastar teatry «Rýhanı jańǵyrý» aıasynda Astananyń 20 jyldyǵyna oraı jańasha usynǵan Ǵabıt Músirepovtiń «Qyz Jibek» mıýzıkliniń búgin premerasy ótti. Sonymen qatar 13, 14, 15 sáýir kúnderi de elorda jurtshylyǵy men qonaqtary bul mıýzıkldy tamashalaı alady.
«Qyz Jibek» - máńgilik mahabbat jyry. Shekti rýynyń aıdaı sulý arýy Jibek pen Jaǵalbaıly rýynyń batyry, seri Tólegenniń arasynda tutanǵan sezim shoǵy kirshiksiz mahabbatqa ulasady. Alaıda mahabbat barda qyzǵanyshtyń da qatar júrýi ómir zańdylyq. Jibek arýǵa burynnan ǵashyq sol aýyldyń Bekejan esimdi batyry da sulýdan dámeli kóńilin jasyrmaı, mahabbat úshin ashyq aıqasqa túsedi. Qaıshylyqqa toly kúrestiń sońy orny tolmas ókinishke ulasady...
Ǵasyrdy ǵasyrǵa jalǵaǵan jaýhar jyrdyń Jastar teatry sahnasynda jandaný men til qatý ádisi de, «sóıleý» qalyby da ózgeshe. Evgenıı Brýsılovskııdiń zamanaýı únde jańasha óńdelgen klassıkalyq mýzykasy kórermenin formalyq, ıdeıalyq hám kórkemdik ereksheligimen baýraıdy. Qazaqtyń baıyrǵy salty - bastańǵy stılinde órbıtin mıýzıklde negizinen jastardyń syry men muńy, armany men muraty, eń bastysy, kirshiksiz mahabbaty alǵa shyǵady. Ǵajaıyp mýzyka tili arqyly sezim kúıin sherter qoıylym kórermenin beı-jaı qaldyrmaıdy.
