Astana Japonııanyń Osaka qalasymen yntymaqtastyqty jetildire túsýge nıetti
Astana ákimi kúnshyǵys eliniń meımandaryn qarsy alyp, qos taraptyń ózara tıimdi yntymaqtastyǵy úshin alǵys bildirdi.
«Astana qalasynyń medıtsınalyq jáne jedel járdem qyzmeti avtomobılderiniń parki, sýmen jabdyqtaý júıesin jańǵyrtý, logıstıkalyq jelini jetildirý syndy kóptegen birlesken nátıjeli jumystar júrgizildi. Bul jopandyq taraptyń Astananyń damýyna qosqan az ǵana úlesi. Sizdiń búgingi saparyńyz qalalar arasyndaǵy uzaq merzimdi seriktestiktiń kepili bolaryna senimdimin», - dedi Áset Isekeshev.
Budan basqa, kóptegen elordalyq kompanııalar Kaıdzen júıesine kóshýde, dástúrli japon ashanasy bar meıramhanalar kóptep ashylýda, al japon jekpe-jeginiń jankúıerleri qalanyń kóptegen sport zaldarynda sheberlikterin synaı alady.
Eske salaıyq, 2015 jyldyń 27 qazanynda Astanada Qazaqstan Prezıdenti Nursultan Nazarbaev pen Japonııanyń Premer-mınıstri Sındzo Abeniń qatysýymen Qazaqstan-Japon bıznes forýmy ótken bolatyn. Onda Memleket basshysy japondyq isker topty ınvestıtsııalyq jobalarǵa qatysýǵa shaqyrdy. Mańyzdy jobalardyń biri - EKSPO-2017 mamandandyrylǵan halyqaralyq kórmesi.
«Eki eldiń arasyn baılanystyratyn taǵy bir sala - bul bizdiń beıbit ómir súrýdegi ortaq ustanymyz jáne memleketter arasyndaǵy yqpaldastyq. Japonııa men Qazaqstan arasyn ıadrolyq qarý máseleleri boıynsha ózara túsinistikke negizdelgen tarıhı tájirıbe biriktiretini sózsiz», - dedi ákim Osaka qalasynyń merine.
Budan basqa, qala ákimi Astana men Osaka arasyndaǵy seriktestikti odan ári damytýǵa qyzyǵýshylyq tanytyp, Osakada turǵyzylǵan jasandy aral ústindegi «Kansaı» halyqaralyq áýejaıy syndy qala qurylysyndaǵy sheshimder boıynsha tájirıbe almasýǵa shaqyrdy.
Ásirese, týrızm ındýstrııasyn damytý boıynsha yqpaldastyqqa asa kóńil bólindi ári Osaka qalasyndaǵy tarıhı bekinis sııaqty Astanada da kórikti jerler qurý máselesi, Universal Studio kóńil kóterý parki, kelýshiler arasynda asa tanymaldyqqa ıe «Kaıýkan» okeanarıým syndy erekshe jobalar máselesi talqylandy.
«Astanada EKSPO-2017 kórmesin ótkizý qaladaǵy ınfraqurylymdy odan ári damytýǵa yqpal etedi, «jasyl» ekonomıkaǵa kóshýge múmkindik ashady, sondaı-aq, jalpy eldiń ekonomıkasy úshin qýatty mýltıplıkatıvti nátıje beredi. Osyndaı mańyzdy sharanyń ótkizilýi bizdiń eki tarapty yqpaldastyǵymyzdyń tarıhyna jańa serpin berip, qalalar arasyn barlyq taraptan jaqyndastyra túsetinine kámil senemin», - dedi ákim.
