Astana janyndaǵy eldi mekenderdiń qalaǵa qosylý merzimi belgisiz
ASTANA. QazAqparat - Elordanyń ıeligine engen jer telimderiniń aýmaǵynda eldi mekender joq. Bul týraly búgin baspasóz máslıhatynda «Astana Bas jospary» ǵylymı-zertteý jobalaý ınstıtýty» JShS dırektory Sársembek Júnisov málim etti, dep habarlaıdy QazAqparat.
«Qazirgi ýaqytta Astana aýmaǵyna Talapker, Qoıandy, Jibek joly jáne basqa da eldi mekenderdiń qosylýyn eskerip otyrǵanymyz joq. Bas josparda bul aýyldardy qarastyrmadyq. Biz qalanyń josparyn jasaǵan kezde, shekarany birden naqty syzyp alǵanbyz. Sondyqtan bul aýyldardy qosýdy oılastyrǵan joqpyz»,-dedi Júnisov.
Osy oraıda ol qala mańyndaǵy aýyldardyń ósimi únemi qadaǵalaýda bolatynyn jetkizdi.
«Elorda mańyndaǵy 30 shaqyrym jáne 60 shaqyrymdyq aýmaqtardy qarastyryp qoıdyq. Bul eldi mekenderdiń ósýin qadaǵalaýymyz kerek. Sebebi, qala mańyndaǵy aýylda durys emes ózgerister bolsa, bolashaqta qıyndyqtar týyndatýy yqtımal. Sondyqtan Astana mańyndaǵy tıisti bir aýyldyń bas josparyn jasaǵan kezde bizben kelisýi kerek. Biz qalanyń ósýine baılanysty osy qujatqa qarap, tıisti jaýabymyzdy beremiz. Jalpy, elorda janyndaǵy naqty bir eldi mekenniń qosylýy merzimi belgisiz»,-dep atap ótti ol.
Budan bólek ol qala aýmaǵynda saıajaılar bolmaıtynyn atap ótti.
«Búginde bas josparǵa sáıkes, elordanyń ishinde saıajaılar joq. Barlyq saıajaılar arnaıy aımaqtarda eskerilgen, ıaǵnı qalanyń shekarasynan tys aýmaqtarda ornalastyrylǵan. Astananyń ishinde bolǵan saıajaılardyń barlyǵy buzylady. Olardyń ornyna saıabaqtar salynady nemese qandaı da bir aýdannyń qurylysy júrgiziledi»,-dedi S. Júnisov.
