Astana jáne SQO basshylary aldaǵy yntymaqtastyq perspektıvalaryn talqylady
PETROPAVL. QazAqparat - Petropavlda «Astana-Soltústik Qazaqstan oblysy óńiraralyq yntymaqtastyq» bıznes-forýmy ótti, dep habarlaıdy QazAqparat tilshisi.
Óńirlik kásipkerler palatasy baspasóz qyzmetiniń málimdeýinshe, oblys ákiminiń orynbasary Dáýren Jandarbek mundaı sharalar óńirler arasyndaǵy baılanystardy odan ári jaqsartyp, ózara tıimdi taýar aınalymyn arttyrýǵa, sabaqtas salalarda tájirıbe almasý jáne óńiraralyq jobalardy iske asyrýǵa oń serpin beretinin aıtqan.
«2017 jyly Astana qalasynyń ónerkásip kásiporyndarymen taýar aınalym kólemi 16 mıllıard teńgeden asty. Bul kórsetkish 2016 jylǵymen salystyrǵanda 6 esege kóp. Aı saıyn oblys kásiporyndary men sharýalary et, sút, makaron jáne kondıter ónimderin, jartylaı fabrıkattardy jetkizip keledi», - dedi D. Jandarbek.
Ol Soltústik Qazaqstan oblysy elorda naryǵyna básekege tózimdi ári sapaly ónimderdi qajetinshe jetkizýge jáne ónerkásip, áleýmettik salalarda jańa tehnologııalardy engizý boıynsha tájirıbe almasýǵa daıyn ekenin jetkizdi.
«Astana qashan da yntymaqtastyq pen ınvestıtsııalarǵa daıyn bolyp kelgen. Elordalyq bıznesmender Petropavlda ári búkil oblysta ózderine qyzyqty bolatyndaı baǵyttardy taba alady dep oılaımyn. Bizdiń bıznes qurylymdar Sizdermen yntymaqtastyqty budan da jaqsartýǵa nıettenip otyr», - deıdi Astana qalalyq máslıhatynyń hatshysy Janat Nurpeıisov.
Ol Soltústik Qazaqstan oblysynyń Astananyń mereıtoıyna ázirlep otyrǵan syılyǵy úshin óńir basshylyǵyna alǵys bildirdi. SQO ákimdigi torqaly toıǵa arnap «Astana-Qarqaraly» kúre jolynyń boıynda 2,5 kılometrge sozylǵan velosıpedshiler jáne jaıaý júrginshiler jolaqtaryn tósep jatyr.
Bıznes-forýmnyń aıaǵynda taraptar birneshe ekijaqty qujattarǵa qol qoıdy.
