Astana jáne Qaraǵandy oblysynyń ákimderi yntymaqtastyq týraly memorandýmǵa qol qoıdy
QARAǴANDY. QazAqparat - Elordanyń 20 jyldyq mereıtoıy qarsańynda Qaraǵandyda «Astana qalasy men Qaraǵandy oblysynyń aımaqaralyq seriktestigi» atty bıznes-forým ótti. Forýmnyń sońynda taraptar yntymaqtastyq týraly memorandýmǵa qol qoıdy, dep habarlaıdy QazAqparat tilshisi.
Forýmda aımaqaralyq yntymaqtastyqty damytý máseleleri talqylandy.
Qaraǵandy oblysynyń ákimi Erlan Qoshanov qonaqtardy kele jatqan Astana kúnimen quttyqtady.
«Astananyń qurylysyna Qaraǵandy oblysy belsene qatysty. Bizdiń kóptegen jerlesterimiz elordada jumys istep jatyr. Jalpy, Astana men Qaraǵandy oblysynyń ózara seriktestigi tabysty júrip jatyr. Ózderińizge málim, Qaraǵandy oblysynyń ornalasqan jeri men ınfraqurylymy qolaıly. Bıyl Astana-Qaraǵandy avtobanynyń qurylysy aıaqtalady, bul bizdiń qalalarymyzdy odan ári jaqyndata túspek», - dep atap ótti óńir basshysy.
Ol bıznestegi ekijaqty baılanystardy da tilge tıek etti. Qaraǵandy oblysy Astanaǵa azyq-túlik jetkizýge de atsalysýda. 2018 jyly jetkiziletin ónim kólemin 40% deıin arttyryp, 66 myń tonnaǵa jetkizý kózdelip otyr.
Erlan Qoshanov Smart City jobasyn iske asyrýda birlese jumys isteýdi usyndy. Onyń pikirinshe, týrızm, kásipkerlik jáne tsıfrlyq tehnologııalar salalarynda aımaqaralyq yntymaqtastyqty damytý qajet.
«Ótken jyly biz EKSPO - 2017 kórmesi aıasynda elimizdiń barlyq óńilerinen kelgen delegatsııalardy qabyldadyq. Bıyl ózimiz aımaqtarǵa saparlap jatyrmyz. Elordalyq ansamblder men teatrlar respýblıka qalalarynda óner kórsetip, murajaılarymyz óz kórmelerin usynýda. Biz segiz aımaqta bolyp, 52 memorandýmǵa qol qoıdyq», - dedi Áset Isekeshev.
Kezdesý sońynda taraptar aımaqaralyq yntymaqtastyqty nyǵaıtý boıynsha kelisim jasady. Astana qalasy jáne Qaraǵandy oblysy ákimdikteri, «Astana Konvenshn Bıýro» JShS men Qaraǵandy oblysynyń kásipkerlik basqarmasy, «Astana Innovations» AQ men Qaraǵandy oblysynyń aqparattandyrý, memlekettik qyzmetterdi kórsetý jáne muraǵattar basqarmasy, «Astana» jáne «Saryarqa» ÁKK arasynda ekijaqty memorandýmǵa qol qoıyldy.
Astana ákimi Áset Isekeshev jumys sapary barysynda Temirtaýdaǵy QR Tuńǵysh Prezıdentiniń tarıhı-mádenı ortalyǵynda boldy. Sondaı-aq Qaraǵandynyń Maker quıý-mashına qurastyrý zaýytyna jáne «Lých» neıroońaltý ortalyǵyna bardy.
