Astana jáne Almaty qalalarynda Quran Kárim festıvali men aptalyǵy ótedi
ASTANA. 13 tamyz. QazAqparat - Iran Islam Respýblıkasy Elshiliginiń mádenı ókildigi Qazaqstan musylmandar dinı basqarmasymen jáne Nur-Astana meshitimen birlese otyryp, 2012 jyldyń 9 tamyzynan bastap Almaty jáne Astana qalalarynda
kallıgrafııa jáne aǵash betine kórkem oıý salýmen aınalysatyn ırandyq sheberler men Qurandy daýystap mánerlep oqıtyn «Tavashıh» tobynyń qatysýymen «Quran Kárim festıvali men aptalyǵyn» ótkizedi.
Atalǵan baǵdarlamada ırandyq kallıgrafııa sheberi Hasan Mınaıdyń 24 jumysy, aǵash betine kórkem oıý salý sheberi Muhammed Reza Taýýabıdiń 22 jumysy usynylady. Atalǵan jumystarǵa qosa, Ǵolamhasan Amırhanı, Muhammed Ahsaı, Kove Tımýrı, Sahafı tárizdi qazirgi kezeńdegi kallıgrafııa sheberleriniń 16 jumysy kórsetiledi. Bul kórmede usynylǵan basqa da jumystar Ǵodres Razavı aýdany men Ulttyq murajaı qoryndaǵy Quran jumystarynyń sýretteri bolyp tabylady.
Kórmeniń basqa bóligi Quran Kárimniń ár túrli tilderdegi 17 aýdarmasynan turady, olardyń birqatary Qazaqstan musylmandar dinı basqarmasynyń kómegimen basylyp shyqqan.
Sonymen qatar bul kórmede Quran jáne ıslamı ǵylymdardyń aýdıo jáne beıne baǵdarlamalaryn jasaýda aldyńǵy qatarly sanalatyn Kompıýterlik zertteý ıslamı ǵylymdar ortalyǵynyń («Nur» baǵdarlamalyq qamtamasyz etý) kómegimen daıyndalǵan Qurannyń aýdıo jáne beıne materıaldary usynylady.
Bul kórmede tolyq Quran Kárimnen, halyqaralyq bes qarıdyń daýysy men onnan asa tilderdegi Quran aýdarmalarynan turatyn, Iran Islam Respýblıkasynda jasalǵan sóıleıtin quranı qalam usynylady.
Quran Kárim festıvali men aptalyǵynyń ashylý saltanatynda Qurandy daýystap mánerlep oqıtyn «Tarashıh» toby óner kórsetedi.
Quran Kárim festıvali men aptalyǵy baǵdarlamalary Almaty qalasynda 2012 jyldyń 9-12-shi tamyz aralyǵynda Jeltoqsan kóshesi, 137 (Jambyl kóshesiniń qıylysy) meken-jaıy boıynsha ornalasqan Almaty ortalyq kórme zalynda ótedi. Saltanatty ashylý rásimi 9 tamyz kúni saǵat 16:00-de Almatydaǵy Iran Islam Respýblıkasynyń qurmetti bas konsýly, Qazaqstandaǵy Iran Islam Respýblıkasy Elshiliginiń mádenı ókildigi, Qazaqstan musylmandar dinı basqarmasy tarapynan Kóktóbe meshitiniń múftıi men basqa da bul sharaǵa qyzyǵýshylyq tanytqandardyń qatysýmen ótedi.
Quran Kárim festıvali men aptalyǵy baǵdarlamalary Astana qalasynda 2012 jyldyń 13-16 tamyz aralyǵynda «Nur-Astana» meshitinde ótedi. Saltanatty ashylý rásimi 13 tamyz kúni saǵat 20:00-de Qazaqstandaǵy Iran Islam Respýblıkasynyń elshisi men mádenı keńesshisi, Astanadaǵy bas múftıdiń orynbasary, Qazaqstandaǵy din ister agentigi, «Nur-Astana» meshitiniń bas ımamy men basqa da bul sharaǵa qyzyǵýshylyq tanytqandardyń qatysýmen ótedi.
Quran Kárim festıvali men aptalyǵy ótýimen qatar, Qurandy daýystap mánerlep oqıtyn halyqaralyq «Tavashıh» toby Almaty jáne Astana meshitterinde óner kórsetip, Quran oqý qyraǵattaryn úıretý semınarlaryn ótkizedi.
