Astana — Aqtóbe matchyndaǵy áreketi úshin jankúıerge aıyppul salyndy
ASTANA. KAZINFORM — Astanada fýtbol matchyn tamashalaý kezinde qoǵamdyq tártipti buzǵan jankúıer ákimshilik jaýapkershilikke tartyldy.
Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda ÁQBtK-niń 434-babynyń 1-bóligi («Usaq buzaqylyq») boıynsha azamat T.-ǵa qatysty ákimshilik is qaraldy.
Sot materıaldaryna sáıkes, azamat «Astana» men «Aqtóbe» komandalary arasyndaǵy match kezinde «Astana Arena» sport kesheninde aldyńǵy qatardaǵy oryndyqtyń arqalyǵyna jalańaıaq aıaqtaryn qoıyp, aınalasyndaǵylarǵa anyq qurmetsizdik tanytyp, qoǵamdyq tártipti buzǵan.
Sot otyrysynda quqyq buzýshy óz kinásin tolyq moıyndap, jasaǵan áreketine ókinish bildirdi. Onyń kinási Instagram áleýmettik jelisinde jarııalanǵan beınejazbamen de dáleldengen.
— Sot quqyq buzýshylyqtyń sıpaty men qoǵamdyq qaýiptilik dárejesin, sondaı-aq árekettiń qoǵamdyq tártipti buzýǵa jáne ózgelerge qurmetsizdik kórsetýge baǵyttalǵanyn eskere otyryp, azamat T.-ǵa 20 aılyq eseptik kórsetkish (AEK) mólsherinde ákimshilik aıyppul saldy, — dep habarlady sottyń baspasóz qyzmeti.
Aıta keteıik, Ákimshilik quqyq buzýshylyq týraly kodekstiń 434-babynyń 1-bóligine sáıkes, usaq buzaqylyq úshin 20 AEK kóleminde aıyppul, 20-dan 60 saǵatqa deıin qoǵamdyq jumystar nemese 5-ten 10 táýlikke deıin ákimshilik qamaq jazasy qarastyrylǵan.
Sot qaýlysy ázirge zańdy kúshine engen joq.
Eske salaıyq, buǵan deıin qazaqstandyqtardyń 9,3 mıllıard teńge aıyppuly men ósimpuly keshirilgenin habarlaǵanbyz.
