«Astana jańa ýnıversıtetiniń» iske qosylýymen «Bolashaq» halyqaralyq stıpendııasynda bakalavr baǵdarlamasy qysqartylatyn bolady - baspasóz máslıhaty
ASTANA. Sáýirdiń 29-y. QazAqparat /Gúlmıra Álıakparova/ - «Astana jańa ýnıversıtetiniń» iske qosylýymen «Bolashaq» halyqaralyq stıpendııasynda bakalavr baǵdarlamasy qysqartylatyn bolady. Bul týraly búgin QR Tuńǵysh Prezıdentiniń ıntellektýaldyq mektebinde ótken baspasóz máslıhatynda atalmysh ýnıversıtettiń vıtse-prezıdenti Qadısha Daıyrova málim etti.
«Bolashaq» baǵdarlamasyn Prezıdent, elge joǵary bilikti kadrlar asa qajetti bolǵan ýaqytta taǵaıyndaǵan bolatyn. 2005 jyly N.Nazarbaev baǵdarlamanyń aýqymyn keńeıtti. Qazir stıpendıattardyń belgili bir sany bakalavrıat baǵdarlamasy boıynsha bilim alýda. Degenmen, bakalavrıat dárejesi - joǵary bilimniń sońyna deıin aıaqtalmaǵan túri. Sondyqtan, 4 jyl boıy bıýdjettik qarajatty shyǵyndaý tıimdi emes. Sebebi, bir bakalavrdy oqytý úshin eki magıstranttyń aqshasy tólenip otyr», - dep atap ótti ol.
Q.Daıyrovanyń aıtýynsha, osy baǵytta yntymaqtastyqta jumys isteý úshin búgin, Halyqaralyq baǵdarlamalar ortalyǵymen kezdesý ótti. Onyń sózine qaraǵanda, «Astana jańa ýnıversıtetiniń» iske qosylýymen «Bolashaq» baǵdarlamasynan qandaı da bir mamandyqtar jóni-joq mehanıkalyq túrde alyp tastalmaıdy. Ol úshin úlken taldaý jasalyp, Qazaqstanǵa asa qajetti jáne munda oqytylmaıtyn mamandyqtar anyqtalady da, bilim berý solar boıynsha júzege asyrylatyn bolady. Biraq Q.Daıyrova atap kórsetkendeı, olardyń sany shekteýli jáne óte az kólemde bolady.
«Bolashaq» baǵdarlamasynan bakalavrıattyń qysqartylýymen stıpendıattardyń sany qysqarmaıdy. Bakalavrıattan únemdelgen qarajat magıstranttardyń búgingiden kóp sanyn oqytýǵa jumsalatyn bolady.
