Astana Jalpy óńirlik ónim deńgeıi boıynsha alǵashqy úshtikke kiredi

ASTANA. QazAqparat - Astana qalasy boıynsha 2015 jylǵy І toqsandaǵy jalpy óńirlik ónim 828670,2 mln. teńgeni qurady, dep habarlady qalalyq ákimdiktiń baspasóz qyzmetinen.

Astananyń JÓÓ úlesi respýblıkalyq kólemniń 10%-yn quraıdy - bul Almaty qalasy (20%) jáne Atyraý oblysynan (12,4%) keıingi úshinshi kórsetkish. JÓÓ salalyq qurylymynda ónerkásip úlesi 5%, qurylys - 5,6%, kólik jáne qoımalaý - 9,6%, jyljymaıtyn múlikpen jasalatyn operatsııalar - 10,9%, kóterme jáne bólshek saýda; avtomobılderdi jáne mototsıklderdi jóndeý - 23,5%, basqa da qyzmetter - 45,4% qurady. Jalpy óńirlik ónim elorda halqynyń jan basyna shaqqanda 968,5 myń teńgeni qurady jáne respýblıka óńirleriniń arasynda Atyraý oblysy (1761,3 myń teńge) jáne Almaty qalasynan (998,3 myń teńge) keıin úshinshi orynda.