«Astana» - «ıAblonets»: elordalyqtar qaqpasyna avtogol soǵyldy
ASTANA. QazAqparat - «Astana Arena» stadıonynda Eýropa lıgasy toptyq kezeńiniń 4-týry aıasyndaǵy «Astana» - «ıAblonets» (Chehııa) matchynyń birinshi taımy aıaqtaldy, dep habarlaıdy QazAqparat tilshisi.
Oıyn alǵashqy mınýttardan qyza tústi. Ásirese óz jankúıerleriniń kóz aldynda birinshi nómirmen oınaýǵa tyrysqan elordalyq ujymnyń shabýyldary qaýipti bola tústi.
18-mınýtta buryshtamadan keıin qolaıly pozıtsııada turǵan 11-nómirdegi Pedro Enrıke gol soǵyp, alań ıelerin alǵa bastady.
Jiberilgen goldan keıingi qonaqtardyń oıynynda birshama jınaqylyq baıqaldy. Oqtyn-oqtyn uıymdastyrǵan shabýyldary údeı túsip, esepti teńestirýge de qol jetkizdi. 41-mınýtta buryshtamadan keıin dop elordalyqtardyń qorǵaýshysy Bahtııar Zaınýtdınovke tıip qaqpaǵa kirdi. Avtogol Bahtııarǵa jazyldy.
Aıta keteıik, oıyn tóbesi jabyq «Astana Arena» stadıonynda ótip jatyr.
