Astana Wolves: Amerıkandyq fýtbol elordada
ASTANA. QazAqparat - AQSh-ta keńinen taraǵan sport túrleriniń biri elimizde asa tanymal bolmaǵanymen, oǵan áýes jandardyń kúshimen damytylyp keledi. Astana Wolves áýesqoılar komandasy óziniń alǵashqy jattyǵýlaryn eki jyl buryn bastaǵan bolatyn. Búgingi tańda «qasqyrlar» komandasyna 40-50 adam múshe. Olar atalǵan sport túrine asa qumar. 18 maýsymda Ortalyq Azııa lıgasy aıasynda fýtbolshylar Bishkektiń «Barystar» komandasymen kúsh synasady, dep habarlady qala ákiminiń resmı saıty.
Amerıkandyq fýtbol komandasyn Denıs Kazımırenko men Asset Aınabekov qurǵan. Ony jasaqtaý ıdeıasyn olar kópten beri oılap júrip, osy sport túrine áýes jandarmen birge iske asyra aldy.
- Bir joly dosymnyń úıinde spýtnıktik kanaldan oıyndy kórip, unatyp qaldym, bul serpindi, kúshti, erdiń minezin ashatyn oıyn. Qazirgi kezde Astanada, sodan keıin Qazaqstanda federatsııa qurýdyń joldaryn izdestirip jatyrmyz. Árıne, bul úshin túrli óńirlerden birneshe komanda qajet. Ázirge, olardyń sany óte az. Basqa óńirlerde komandalardy damytýǵa belsendi túrde qatysamyz, joldastyq kezdesýler ótkizemiz, biz tolyqqandy lıga qurýǵa múddelimiz,- deıdi Denıs.
Sportshylar Nazarbaev ýnıversıtetiniń alańynda daıyndalady. Biryńǵaı jattyǵý jospary ázirlendi, balalar sol boıynsha jumys isteıdi. Olarǵa tájirıbeli oıynshylar men jaraqat alyp, jattyǵýǵa qatysa almaıtyndar da kómektesedi. Komanda quramyna 16-dan 36 jasqa deıingi fýtbolshylar kiredi. Dene bitimine qaramastan, kez kelgen adamǵa belgili bir pozıtsııa beriledi, bul sport túrine bári de qatysa alady.- Men rannınbek pozıtsııasynda oınaımyn - bul doppen júgiretin oıynshy, - amerıkandyq fýtboldaǵy basty pozıtsııalardyń biri. Al oıynnyń ózine jaqynda ǵana qosyldym. Bir jyl degen kóp emes, degenmen osy ýaqyttyń ishinde komanda jınap, jaqsy adamdarmen, árqashan da kómekke kelýge daıyn dostarymmen tanystym. Amerıkandyq fýtbol - qaýipti, túıispeli sport túri. Onda komandalyq rýh bar, keıbir sport túrlerine sol jetispeı turady, - deıdi Astana Wolves komandasynyń oıynshysy Alekseı Mıhasev.
Tájirıbeli oıynshylardyń biri Baqyt Jazyqbekovtyń aıtýynsha, bir qaraǵanda oıynda kóp jaraqat alýǵa bolatyn sııaqty, biraq bul tájirıbesizdikten oryn alady. Bastysy, tehnıkalyq aıla-tásilderdi meńgerý, durys qulaı bilý jáne soqqy jasaǵanda óz-ózińdi ustana bilý kerek, kıimdi de týra ólshem boıynsha kııý qajet.
- Bastapqy kezde jattyǵýǵa qatysqanda bir túrli kórinetin, adamdar birin biri ıterisip júredi. Synyptasym biraz ýaqyt shuǵyldanyp, keıin meni de shaqyrdy. Men barǵanyma ókinbeımin. Oıynǵa degen qyzyǵýshylyǵym artty. Men jumys isteımin, al munda komandamen birge ýaqytymdy ótkizý úshin kelemin, jastarǵa úıretemin, demalamyn, - deıdi ol.
Fýtbolshylar úlken maqsatty kózdep otyr - aldaǵy ýaqytta mańyzdy oıyn ótedi. Match Q. Muńaıtpasov atyndaǵy stadıonda uıymdastyrylady jáne bul qaıyrymdylyq shara bolmaq. Jınalǵan qarjy múgedektigi bar talantty adamdardy Bolgarııaǵa halyqaralyq konkýrsqa jiberýge baǵyttalady. Kirý bıletiniń quny - 200 teńge.
Sonymen qatar, jaqynda elordada flag-fýtboldan áıelder quramasy quryldy. Amerıkandyq fýtbolǵa qaraǵanda bul túıispeli emes sport túri. Qyzdar beline jalaýshalar baılap alyp oınaıdy, al oıyndy toqtatpas úshin qarsylasyńnyń jalaýshasyn tartyp alý kerek.
