Astana vokzalyndaǵy «shaıtanı belgiler» alynyp tastaldy (FOTO)
ASTANA. 14 sáýir. QazAqparat - Astana vokzalynda ekinshi qabattyń baǵandaryna jabystyrylǵan qorqynyshty belgiler týraly áleýmettik jelilerde kóp aıtylýda,
dep jazady «Astana aqshamy» gazeti.
«Bul - shaıtanı belgi» dep shýlaǵan jurt vokzal ákimshiliginiń álgi túsiniksiz belgilerdi alyp tastaýyn talap etken. Máseleniń mánisin bilý úshin vokzal basshylyǵymen kezdesýge týra keldi», - dep jazady basylym.
Shynynda, jolaýshylarǵa arnalǵan zaldyń ekinshi qabatyndaǵy birneshe baǵanǵa nebir túsiniksiz sýretter japsyrylǵan. Anyqtap qaraǵan adam bul belgilerdiń ne maǵyna beretinin bilmeıdi. Sebebi, alty jáne segiz buryshty sýretterdiń ishinde ne ańǵa, ne adamǵa uqsamaıtyn tańbalar salynǵan. Bir qaraǵanda, úılesimsiz jabystyrylǵan beıneler arhıtektýralyq talaptarǵa sáıkes kelmeıdi.
Vokzal qyzmetkerleriniń aıtýynsha, bul sýretter 2003 jyldan beri tur. Alaıda, sońǵy ýaqytta halyq tarapynan osy belgilerge qatysty kelispeýshilikter kóp aıtylýda. Sondyqtan jolaýshylar zalyndaǵy túsiniksiz belgilerdi «Vokzal-servıs» AQ basshylyǵyna da kórsetý qajet dep sheshildi. Soltústik aımaq fılıalynyń bastyǵy Abaı Sábıtulyna adamǵa úreı týǵyzatyn bul sýretter týraly halyqtyń jáne ǵalymdardyń bildirgen pikiri jetkizildi.
«Jón biletin azamat eken. Eki kúnnen keıin álgi belgiler túgel alynyp tastaldy. Astanalyqtardyń ashýyn keltirgen qorqynyshty belgiler «qurydy», - dep jazady «Astana aqshamy».
Fotolar Namys.kz saıtynan alyndy.
