Astana vokzalyndaǵy avtoturaq 26 naýryzǵa deıin tegin bolady
ASTANA. QazAqparat - Vokzal mańyndaǵy aqyly avtoturaq alańy tegin rejimde jumys isteıdi.
Bul týraly Astana ákimdigi baspasóz qyzmetiniń basshysy Elvıra Júrgenbaeva habarlady.
«2017 jylǵy 18-26 naýryzda vokzal mańyndaǵy aqyly avtoturaq tegin bolady. Tegin rejim kezinde, aqyly avtoturaqtaǵy kólik aǵynyn retteý úshin ınspektorlar qyzmetiniń jumysy kúsheıtiledi», - dep jazdy ol Facebook-qa.
Eske salsaq, 10 qańtarda Astana vokzaly mańyndaǵy avtoturaq aqyly túrde jumys isteı bastady.
Avtoturaqtyń syıymdylyǵy 250 mashına, onyń 9-y - múmkindigi shekteýli tulǵalarǵa, 20 oryn resmı taksı qyzmetteriniń ókilderine arnalǵan. Turaqtyń alǵashqy 30 mınýtyna aqy alynbaıdy, kólik eki saǵatqa deıin tursa - 200 teńge, 12 saǵatqa deıin tursa 1000 teńge alynady. 24 saǵatqa deıin - 1800 teńge. Avtoturaq qyzmetin ekinshi táýlik qoldaný - 2000 teńge kóleminde.
