Astana vokzalynda ótken reıdte «Margo» esimdi ıt zańsyz kelýshilerdi anyqtaýǵa kómektesti
ASTANA. 15 mamyr. QazAqparat - «Zańsyz kelýshi-2012» jedel profılaktıkalyq is-sharasy óz jumysyn bastady, dep habarlaıdy Kóliktegi ІІD baspasóz qyzmeti.
Búgin Kóliktegi ІІD kóshi-qon polıtsııa basqarmasynyń bastyǵy Nurlan Bashbaıuly bastap barǵan arnaıy top Astananyń temirjol vokzalynda №16 «Almaty-Petropavl» baǵytyndaǵy poıyz vagonynda kınologııalyq ortalyqtyń Margo esimdi qyzmettik-izdestirý ıtiniń kómegimen izdestirý sharalaryn júrgizdi.
KІІD Kóshi-qon polıtsııa basqarmasynyń, Astana stantsııasy ІІJB kóshi-qon polıtsııasy bólimi, KІІD baspasóz qyzmetkerleri jáne buqaralyq aqparat quraldary ókilderiniń qatysýymen ótken reıd barysynda is-sharany uıymdastyrýshylar jolaýshylardyń qujattaryn tekserdi. Al Margo tyıym salynǵan jáne zańsyz zattardy izdedi. Aktsııa barysynda eshqandaı quqyq buzýshylyq anyqtalǵan joq.
14-20 mamyr aralyǵynda jalǵasatyn «Zańsyz kelýshi-2012» sharasyna ІІO-nyń 721 qyzmetkeri jumyldyrylǵan. Onyń ishinde 52 kóshi-qon polıtsııasy, 118 krımınaldyq polıtsııa, 226 patrýldik polıtsııa qyzmetkerleri jáne 239 basqa sala qyzmetkerleri bar.
Nurlan Bashbaıulynyń aıtýynsha, bir táýliktiń ishinde 8 qylmys tirkeldi. Atap aıtsaq, Semeı stantsııasysynda RF azamaty Qazaqstannyń memlekettik shekarasyn zańsyz ótkeni úshin jáne Astana stantsııasynda RF azamaty zańsyz oq dári alyp júrgeni úshin 2 qylmystyq is qozǵaldy.
Sonymen qatar, zańsyz shetel jumys kúshin paıdalanýdyń aldyn alý boıynsha 22 nysan tekserilgen bolatyn. Onyń barysynda jeke basyn anyqtaıtyn qujatsyz júrgen 14 adam ýaqytsha ustaý-taratý ornyna ornalastyryldy.
