Astana vokzaly aýmaǵyndaǵy turaqtar aqyly bolmaq
ASTANA. QazAqparat - Búgin QR Investıtsııalar jáne damý mınıstrligi Kólik komıtetiniń tóraǵasy Áset Asaýbaev respýblıkanyń vokzal mańy aýmaqtaryn tártipke keltirýge tapsyrdy. Ol mundaı tapsyrmasyn búgin elordanyń temir jol vokzalynda ótken kóshpeli jıynda berdi.
Jıyn barysynda ol vokzal mańyndaǵy oryn alyp jatqan jaıttarǵa erekshe toqtaldy. Máselen, komıtet tóraǵasy elordanyń temir jol vokzaly tóńireginde resmı taksı qyzmetin uıymdastyrýdaǵy kemshilikterge toqtaldy. Bul máselege oraı, «Vokzal servıs» AQ basshysy Qaırat Turlyhanov óz pikirin bildirip, vokzal mańyndaǵy aýmaqtyń tolyǵymen ózi basqaratyn mekemege qaramaıtyndyǵyn, aldaǵy ýaqytta bul problemanyń óz sheshimin tabatyndyǵyn atap ótti. Dál osy máselege oraı taıaý aralyqta mınıstrlikte qala ákimdigi ókilderiniń qatysýymen arnaıy jıyn da ótpek. Onyń atap ótýinshe, taksıler úshin jeke turaqtar belgilenip, al jolaýshylar ákeletin basqa kólikterge Astana men Almaty áýejaıyndaǵydaı turaq aqyly bolmaq. Sonymen qatar ol bul problemanyń 2016 jyldyń ekinshi toqsanynda tolyq sheshim tabatyndyǵyn basa aıtty.
