Astana - velosıpedshiler úshin qolaısyz qala — Ulybrıtanııa elshisi
ASTANA. KAZINFORM — Astanada velosıpedpen júrýge qolaıly jaǵdaıdy áli de jaqsartý qajet. Ulybrıtanııanyń Qazaqstandaǵy elshisi Sallı Aksvortı ARCHICA halyqaralyq sáýlet forýmynda qala turǵyndarynyń jaıaý júrýine, velosıped tebýine jáne ashyq aýada kóbirek ýaqyt ótkizýine múmkindik beretin orta qurý mańyzdy ekenin aıtty.
Elshiniń sózinshe, Qazaqstan qalalary jyldam ósip keledi. Sondyqtan qazir qansha ǵımarat salynǵany ǵana emes, olardyń aınalasyndaǵy keńistiktiń turǵyndarǵa qanshalyqty qolaıly ekeni de mańyzdy.
— Adamdardy kóbirek jaıaý júrýge, velosıped tebýge jáne ashyq aýada ýaqyt ótkizýge qalaı yntalandyramyz? Men ózim velosıped tebemin. Biraq Astanany velosıpedshiler úshin eń qolaıly qala dep aıta almaımyn, — dedi Sallı Aksvortı.
Ol qalalarda jaıaý júrginshilerge arnalǵan joldarǵa, kógaldandyrý men qoǵamdyq keńistikterge kóbirek mán berile bastaǵanyn atap ótti.
— Aýdandardy qalaı jasyl ári klımat ózgerisine tózimdi ete alamyz? Qalany damyta otyryp, turǵyndardyń ómir sapasyn qalaı jaqsartamyz? Ulybrıtanııa men Qazaqstan osy máseleler boıynsha birlesip jumys isteı alady, — dedi dıplomat.
Qazir Astanada ARCHICA halyqaralyq sáýlet forýmy ótip jatyr. Oǵan sáýletshiler, ýrbanıster, dızaınerler men developerler qatysyp, qalalardy damytýǵa qatysty máselelerdi talqylap jatyr.
Aıta keteıik, buǵan deıin Astanada halyq sanynyń ósýine baılanysty jańa turǵyn aýdandar men áleýmettik nysandarǵa qajettilik artyp otyrǵany týraly jazǵan edik. Materıalda elordanyń aldaǵy jyldardaǵy damýy, qurylys qarqyndy júrip jatqan aýdandar jáne jańa bas josparda qarastyrylǵan ózgerister týraly aıtyldy.
