«Astana» veloshabandozy «Týr Dýbaı-2017» jarysynda top bastaýshyǵa qol jumsady
ASTANA. QazAqparat - Astana komandasynyń veloshabandozy, ýkraınalyq Andreı Grıvko Týr Dýbaı-2017 jarysynyń úshinshi kezeńinde kósh bastap kele jatqan Quick Step Floors komandasynyń sportshysy Marsel Kıtteldi urǵany úshin jarystan shettetildi.
Márege jetisimen Kıttel Andreı Grıvkonyń jazaǵa tartylýyn jáne jarystan shettetilýin talap etti. Óz sportshysynyń qylyǵy úshin Astana komandasy Marsel Kıttel men onyń komandasynan jurt aldynda keshirim surady, dep jazdy velolive.com.
«Meni Astana komandasyndaǵy Andreı Grıvko urdy. Sondyqtan meniń betimdi qan jýyp ketti, biraq qulaǵan joqpyn. Jel bir qyrymyzdan soqqanda pozıtsııa úshin talas bastaldy. Men onyń komandalas joldastarynyń birimen qatar kelip qaldym. Oǵan bul unamady. Ony aınalyp ótpek bolǵanymda, Grıvko men onyń komandalas joldasynyń arasynda qalyp, Grıvkony sál ıterýge týra keldi. Men jas shabandozben tildeskim keldi, al ol meniń betimnen salyp qaldy», - dep málimdedi Kıttel.
Kıttel bul oqıǵanyń 40-tan astam kýágeri bar ekenin atap ótti. «Ár nárseniń shegi bar, eger daý týyndasa, bul týraly aıtý kerek. Biraq, bireýge zaqym keltirýge esh keshirim joq», - dedi ol.
Andreı Grıvko Feısbýktaǵy paraqshasynda oqys oqıǵa týraly túsindire ketti.
«Kıtteldiń ózi moıyndaǵan pozıtsııa úshin talasta ol meniń komandalas joldasym Dmıtrıı Grýzdevti ıyǵymen qaǵyp alǵa umtyldy. Keıin meni qaǵyp, jol ústinde úlken qaýip týdyrdy. Onyń bul qylyǵynan jalǵyz men emes, búkil artta kele jatqandar qular edi. Onyń basqynshylyq áreketine men de agressııamen jaýap berdim. Ózge sportshylardyń ómiri men densaýlyǵyna qater týdyrǵan bul ózimshildiktiń velosportpen ortaq eshteńesi joq, - dedi veloshabandoz. - Alaıda, men taǵy da jarys uıymdastyrýshylarynan, jankúıerlerden jáne árıne óz komandamnan jaǵymsyz oqıǵa úshin keshirim suraımyn».
