«Astana» veloshabandozy Malaızııada top jardy
ASTANA. 27 aqpan. QazAqparat - «Astana» komandasynyń ıtalııalyq shabandozy Andrea Gýardını «Langkavı týrynyń» jetinshi kezeńinde jeńimpaz atandy, dep habarlaıdy «Alaman» ulttyq sport portaly.
«Maýsym basynan jeńiske jetý maǵan kádimgideı qıyn soqqany ras. Al búgingi tabysymnan soń basym kókke bir eli jetpeı tur desem, artyq aıtqanym emes shyǵar. Men ózimniń jáne komandanyń búgingi baby joǵary deńgeıde ekenine kúmán keltire almaımyn. Barlyǵy tógilgen terdiń jemisi», - dedi Gýardını jarys aıaqtalysymen.
Astana Pro Team shabandozdary Rýslan Tileýbaev pen Asan Bazaevtyń Gýardınıdiń aldyńǵy shepte bolýyna aıanbaı eńbek etti. Ásirese sońǵy 10 shaqyrymda teńizden soqqan jelden qorǵaýda olardyń atqarǵan jumysyn aıtyp jetkizý qıyn.
«Bazaev meni sońǵy 5 shaqyrymnan 2 shaqyrymǵa deıin alǵa súırese, 500 metrlik kórsetkishke deıin bul jumysty Rýslan Tileýbaev atqardy. Jel oń jaqtan soǵyp turdy, sondyqtan men Orica Greenedge shabandozyn yqtaýdy jón sanadym. Al márege 200 metr qalǵanda men shabýylymdy sol jaqtan bastadym. Óz ýaqytynda, óz ornymdy tańdaı bilýdiń arqasynda búgin jeńiske jettik», - dedi Gýardını.
Astana Pro Team Sporttyq dırektory ıAan Kırsıpýý, búgingi jarys kúnin jınalystan bastaǵanyn aıtady.
«Tańerteń barlyǵymyz bas qosyp, aldaǵy jarys kúnin talqyladyq. Biz Malaızııaǵa jeńis úshin keldik, al biz tek júldeli oryndardan kórinýge shamamyz jetti. Árıne, búgingi jeńisten keıin kóńil kúıimiz kóterilip, sońǵy úsh kezeńde Gýardınıdiń jeńisi jalǵasyn tabady degen senimimiz kúsheıdi. Komandanyń ár bir múshesi búgingi nátıjeniń iske asýyna aıanbaı ter tókti», - dedi Kırsıpýý.
«Langkavı týry», 7 kezeń. Kýantan - Dýngýn, 149.8 shaqyrym
1. Andrea Gýardını (Italııa, «Astana»)
2. Franchesko Chıchchı (Italııa, «Vini Fantini - Selle Italia»)
3. Aıdıs Krýopıs (Lıtva, «Orica Greenedge»).
