«Astana» veloshabandozy Erlan Pernebekov mezgilsiz kóz jumdy
ASTANA. QazAqparat - «Astana Pro Team» baspasóz qyzmetinen veloshabandoz Erlan Pernebekovtyń mezgilsiz kóz jumǵanyn qaıǵyra habarlaıdy. Dárigerler onyń aman alyp qalý úshin qoldaarynan kelgenniń barlyǵyn jasasa da, nátıje bolmaǵan.
Veloshabandoz «Astana» komandasymen birge Ekvador elinde jattyǵý jıynynda bolǵan eken. 14 naýryz kúni keshke jaqyn kezekti jattyǵýdan keıin Pernebekov basynyń aýyryp jatqanyn aıtypty. Artynsha ol jergilikti gospıtalǵa jatqyzylady. Dárigerlerdiń aıtýynsha, sportshynyń kúre tamyry jarylyp ketip, bul ınsýltqa ákep soqqan. Sodan veloshabandoz tereń uıqyǵa, ıaǵnı jasandy komaǵa engiziledi. Aýrýhanada onyń qasynda komanda jattyqtyrýshysy Vladımır Remyga bolǵan.
Qazirgi sátte komanda ákimshiligi QR SІM ókilderimen sportshynyń denesin Qazaqstanǵa jetkizý máselesin sheshýde. «Astana» velokomandasy Erlan Pernebekovtyń týǵan-týystaryna qaıǵyryp kóńil aıtady. «Erlannyń ólimi komanda úshin de, búkil Qazaqstan velosporty úshin de orny tolmas aýyr qaza. Biz Erlandy árqashan este saqtaımyz. Ol meırimdi, ashyq-jarqyn jigit bolatyn. Kez-kelgen qıyndyqty moıymaı jeńe biletin qaısar jan edi. Ol uly jeńisterge jetýdi armandady. Jáne otbasynyń, týǵan-týystarynyń tiregi bolatyn. Onyń jarqyn beınesi júregimizde máńgilik saqtalady», - dep habarlaıdy komanda ákimshiligi.
