Astana veloshabandozy «Almaty Týry-2018» kezeńinde jeńiske jetti
ALMATY. QazAqparat - «Astana Pro Team» komandasynyń múshesi Davıde Vıllela «Almaty Týry-2018» kópkúndik velojarysynyń birinshi kezeńinde jeńiske jetti, dep habarlaıdy QazAqparat qalalyq aqparattyq jáne sporttyq HAB-qa silteme jasap.
Davıde Vıllela márege 4 saǵat 9 mınýt jáne 35 sekýndta jetti. 35 sekýndtan soń ekinshi bolyp amerıkalyq sportshy Sımon Pellaýd (Team Illuminate) kelse, Albanııa ókili Pıerpalo Fıkara (Amore&Vita - Prodir) úshinshi orynǵa ıe boldy. Taǵy bir astanalyq Lýıs Sanches tórtinshi keldi.
Búgin Almatyda «Almaty Týry - 2018» halyqaralyq shosse velojarysy bastalǵanyn habarlaǵan bolatynbyz. Búgin saıystyń birinshi kezeńi ótti. Oǵan ár elden kelgen 19 komanda qatysty. Velojarys «Astana» alańynan bastaý alyp, sol jerde aıaqtaldy. Qatysýshylar 182 shaqyrymdy baǵyndyrdy. Qazaqstan atynan 4 komanda qatysyp, olardyń arasynda alǵashqy ret almatylyq Apple Team óner kórsetti. Olar qazaqstandyqtardyń arasynda úshinshi oryndy ıelendi.
Almaty qalasy Dene shynyqtyrý jáne sport basqarmasynyń basshysy Rústem Baıseıtov Davıde Vıllelany quttyqtap, oǵan kóshbasshy jeıdesin tabystady. Al qazaqstandyq úzdik veloshabandoz bolyp Matveı Nıkıtın (Ulttyq qurama) atandy.
Erteń, 30 qyrkúıek kúni velojarystyn ekinshi kezeńi ótedi. Komandalar Halyk Arena kópfýnktsıonaldy kesheninde saǵat 11:00-de jarysty bastap, Medeýde aıaqtaıdy. Baǵyt qashyqtyǵy 160 shaqyrymdy quraıdy.
Eske salaıyq, qala bıligi jarys kezinde avtojoldar ishinara jabylyp otyratynyn aldyn ala eskertken bolatyn.
