«Astana» veloshabandozy «Výelta Ispanııanyń» 11-kezeńinde úzdik ondyqqa endi
ASTANA. KAZINFORM — «Výelta Ispanııa» kópkúndik velojarysynyń 11-kezeńi aıaqtaldy. Kartahena men Lorka qalalary arasyndaǵy 153,8 shaqyrymdyq kezeń sprınterlerdiń tartysymen órbidi. Bul týraly Sports.kz jazdy.
Kezeń jeńimpazy atanǵan brıtandyq Mettıý Brennan («Visma | Lease a Bike») qashyqtyqty 3 saǵat 17 mınýt 18 sekýndta baǵyndyrdy. Ekinshi oryndy frantsııalyq Brıan Kokar («Cofidis») ıelense, belgııalyq Iordı Meıs («Red Bull — BORA — hansgrohe») úzdik úshtikti túıindedi.
«Astana» komandasy sapyndaǵy eń úzdik nátıje ıtalııalyq Alessandro Romelege tıesili. Ol márege segizinshi bolyp jetti. Erıtreıalyq Henok Mýlıýbyrhan 13-orynǵa turaqtasa, kolýmbııalyq Harold Tehada 24-oryn aldy. Ispanııalyq Krıstıan Rodrıges 55-shi, qazaqstandyq Evgenıı Fedorov 88-shi bolyp keldi.
Italııalyq Lorentso Fortýnato jeńimpazdan 2 mınýt 43 sekýnd qalyp, 102-orynǵa jaıǵasty. Al nıderlandtyq Darren Van Bekkým márege 139-shy bolyp jetip, kóshbasshydan 9 mınýt 39 sekýndqa qalyp qoıdy.
Jalpy eseptegi jaǵdaı
Jalpy esepte «Movistar» komandasynyń ıspanııalyq ókili Enrık Mas kósh bastap keledi. Onyń jalpy ýaqyty — 35 saǵat 59 mınýt 2 sekýnd.
Ekinshi orynda slovenııalyq Prımoj Roglıch («Red Bull — BORA — hansgrohe») tur. Ol kóshbasshydan 1 mınýt 18 sekýndqa qalyp keledi. Úzdik úshtikti avstrııalyq Felıks Gall («Decathlon CMA CGM») túıindeıdi. Onyń Masqa qaraǵanda 1 mınýt 39 sekýndtyq aıyrmasy bar.
«Astana» komandasynyń jalpy eseptegi eń úzdik veloshabandozy — kolýmbııalyq Harold Tehada. Ol segizinshi orynda jáne kóshbasshydan 4 mınýt 39 sekýndqa qalyp keledi.
Komandanyń ózge ókilderi arasynda ıspanııalyq Krıstıan Rodrıges 13-orynda (+9 mınýt 42 sekýnd), erıtreıalyq Henok Mýlıýbyrhan 59-orynda (+1 saǵat 7 mınýt 9 sekýnd), ıtalııalyq Lorentso Fortýnato 83-orynda (+1 saǵat 22 mınýt 59 sekýnd), Alessandro Romele 104-orynda (+1 saǵat 38 mınýt 33 sekýnd), qazaqstandyq Evgenıı Fedorov 108-orynda (+1 saǵat 41 mınýt 7 sekýnd), al nıderlandtyq Darren Van Bekkým 110-orynda (+1 saǵat 41 mınýt 54 sekýnd) keledi.
Aıta keteıik, buǵan deıin tasjoldaǵy velosporttan Qazaqstan erler quramasynyń bapkerler shtaby Aıchı-Nagoıada (Japonııa) ótetin 2026 jylǵy Azııa oıyndaryna qatysatyn sportshylardyń tizimin jarııalaǵan bolatyn.
