«Astana» veloshabandozy «Renevı Týr» jarysynda tórtinshi oryn aldy
ASTANA. KAZINFORM — XDS Astana Team komandasynyń veloshabandozy Maık Tenıssen Dúnıejúzilik týrdyń «Renevı Týr» kópkúndiginiń sońǵy kezeńinde úshinshi oryn alyp, jarystyń jalpy qorytyndysynda tórtinshi satyǵa kóterildi.
Belgııanyń Leven qalasynda ótken kezeń 183,7 shaqyrymǵa sozyldy. Sprıntte Alpecin-Premier Tech komandasynyń belgııalyq veloshabandozy Iesper Fılıpsen jeńiske jetti. Ekinshi oryndy Tudor komandasynyń ıtalııalyq sportshysy Lýka Motstsato ıelense, Maık Tenıssen márege úshinshi bolyp jetti.
Jarystyń jalpy esebindegi tórtinshi oryn — Tenıssenniń mansabyndaǵy Dúnıejúzilik týrdyń kópkúndikterindegi eń úzdik nátıjesi. Al XDS Astana Team úshin bul «Renevı Týrdaǵy» 2014 jyldan bergi eń joǵary kórsetkish boldy.
— «Renevı Týrda» osy aptadaǵy nátıjemizge kóńilimiz tolady dep oılaımyn. Men úshin Dúnıejúzilik týrdaǵy kópkúndiktiń jalpy esebindegi eń úzdik nátıje. Sondyqtan bul óte jaqsy kórsetkish, — dedi Tenıssen.
Veloshabandozdyń aıtýynsha, jarys barysynda ózin sál jaısyz sezingen. Alaıda komanda oǵan kúshin saqtap, joǵary nátıje úshin kúresýge kómektesken.
— Gambýrgtegi ekinshi oryn jáne búgingi tórtinshi oryn bizge jiger beredi. Bul barlyq istiń durys baǵytta kele jatqanyn kórsetedi. Men ózimdi joǵary deńgeıde kúresýdi jalǵastyrýǵa kúshim, qalaýym jáne motıvatsııam bar ekenin sezemin. Sondyqtan jumysymyzdy jalǵastyra beremiz, — dedi Tenıssen.
Buǵan deıin«Astana» veloshabandozy Krıstıan Skaronı «Polsha týrynda» ekinshi oryn aldy.
