«Astana» veloshabandozy «Polsha týrynda» júldeger atandy
ASTANA. KAZINFORM — XDS Astana Team komandasynyń ıtalııalyq shabandozy Alessandro Romele «Polsha týrynda» júldeger atandy. Ol kópkúndik velojarystyń úshinshi kezeńinde márege úshinshi bolyp jetti.
Uzyndyǵy 193,5 shaqyrym bolǵan kezeń Gojýv-Velkopolskıı men Zelena-Gýra qalalary arasynda ótti. Jarystyń sheshýshi sátinde jeńimpaz jappaı sprınt arqyly anyqtaldy.
Alessandro Romele márege deıingi tartysta jeńiske talasyp, nátıjesinde úzdik úshtikten kórindi. Márege birinshi bolyp Lidl-Trek komandasynyń ıtalııalyq shabandozy Djonatan Mılan kelse, ekinshi oryndy EF Education-EasyPost sapyndaǵy ulybrıtanııalyq Noa Hobbs ıelendi.
Jarystan keıin Romele bastapqyda komanda Matteo Malýchellıge basymdyq berýdi josparlaǵanyn, alaıda kezeńniń sheshýshi sátine deıin taktıka ózgergenin aıtty.
— Búgingi kezeń de Matteo Malýchellıge qolaıly boldy. Sondyqtan bastapqyda oǵan jumys isteýdi josparlaǵan edik. Alaıda márege jaqyndaǵanda ekeýimiz sóılesip, sprıntke men qatysatyn bolyp birge sheshim qabyldadyq. Sebebi Matteo ózin jaısyz sezindi. Men Djonatan Mılannyń dóńgelegine ilesip, bar kúshimdi salýǵa tyrystym.
Bul nátıjege de, bıik taýdaǵy oqý-jattyǵý jıynynan keıin qol jetkizgen fızıkalyq daıyndyǵyma da óte qýanyshtymyn. Erteńnen bastap kúrdelirek kezeńder bastalady. Biz komanda úshin jumysty jalǵastyrýǵa daıynbyz. Búkil komandaǵa jáne Maýrıtsıoǵa atqarǵan jumysy úshin alǵys aıtqym keledi, — dedi Alessandro Romele.
Eske salaıyq, buǵan deıin XDS Astana Development Team komandasynyń veloshabandozy Lýdovıko Mellano Frantsııada ótip jatqan «Kreız Breız Elıt» kópkúndik velojarysynyń úshinshi kezeńinde márege ekinshi bolyp kelgenin habarlaǵan edik.
