«Astana» veloshabandozy Krıstıan Skaronı «Polsha týrynda» ekinshi oryn aldy

Uzyndyǵy 161,9 shaqyrym bolatyn kezeń Jauanı qalasynan bastalyp, Karpachte márege jetti.

Jeńimpaz jarystyń sońǵy bóliginde anyqtaldy. Márege jaqyndaǵanda úsh shabandoz alǵa shyqty. Sońǵy shaqyrymda olardyń biri shabýyl jasap, Krıstıan Skaronı ǵana oǵan jaýap bere aldy.

Qazaqstandyq komandanyń veloshabandozy aradaǵy alshaqtyqty jyldam qysqartqanymen, jeńiske jetýge sál ǵana ýaqyt jetpedi. Nátıjesinde Skaronı márege ekinshi bolyp keldi.

Kezeń jeńimpazy Bart Lemmen atandy. Úshinshi oryndy frantsýz veloshabandozy Aksel Lorens (Netcompany INEOS) ıelendi.

— Ókinishti, jeńiske bir taban jaqyn qalyp edik. Sońǵy órge kóterilgende qarqynymdy saqtap, kúshimdi márege deıin jetkizýge tyrystym. Kóshbasshynyń arasy qysqara bastaǵanyn kórgende jyldamdyqty arttyryp, bar kúshimdi saldym. Alaıda jeńiske jetýge sál ǵana kúsh jetpeı qaldy.

Aldyńǵy órden keıin Brenner ekeýimiz sál kidirip qaldyq. Osy sátti paıdalanǵan kóshbasshy araqashyqtyqty ulǵaıtyp úlgerdi. Al tómen túsken tus taıǵaq bolǵandyqtan, táýekelge barmaýdy jón kórdim. Sonyń saldarynan kóshbasshyny qýyp jetýge múmkindik bolmady.

Búgin komanda óte jaqsy jumys istedi. Jarystyń sheshýshi sátine deıin meni minsiz jetkizdi. Qazir ózimdi jaqsy formada sezinip júrmin. Jeke jarys aldyndaǵy jalpy esepte basty qarsylastarymnan birneshe sekýnd utyp alǵanym da mańyzdy. Alda áli jeńis úshin talasatyn kezeńder bar, — dedi Krıstıan Skaronı.

Eske salaıyq, buǵan deıin XDS Astana Team komandasynyń ıtalııalyq shabandozy Alessandro Romele «Polsha týrynda» júldeger atanǵanyn jazǵanbyz. Ol kópkúndik velojarystyń úshinshi kezeńinde márege úshinshi bolyp jetti.