«Astana» veloshabandozy ekinshi kezeńde jeńiske jetip, qytaılyq kópkúndikte kósh bastady
ASTANA. KAZINFORM- XDS Astana Team komandasynyń veloshabandozy Matteo Malýchellı Qytaıda ótip jatqan «Taıhý kóli týrynyń» ekinshi kezeńinde jeńiske jetti.
Uzyndyǵy 153,2 shaqyrymdy quraǵan kezeń Chansıdiń joldarynda ótip, jappaı sprıntpen aıaqtaldy. Komandanyń úılesimdi jumysynyń arqasynda Malýchellı jarystyń sońǵy bóligin sátti ótkizip, márege birinshi bolyp jetti.
Li Ning Star komandasynyń danııalyq veloshabandozy Aleksandr Salbı ekinshi oryn aldy. Úshinshi bolyp Qazaqstan komandasynyń taǵy bir ókili Gleb Syrıtsa keldi. Ol sońǵy shaqyrymdarda Malýchellıge qarqyn qosyp, sprıntke shyǵarýǵa kómektesti.
Bul jeńis ıtalııalyq veloshabandozǵa jeńis tuǵyrynyń eń bıik satysyna kóterilip qana qoımaı, kópkúndiktiń jalpy jikteýinde kósh bastaýǵa múmkindik berdi.
— Búgin bári josparymyzǵa saı ótti. Biz Lotto Intermarche komandasyna kezeńdi baqylaýǵa múmkindik berdik, biraq ózimiz de shet qalmadyq. Dıas (Rysbaı) pen Rýslan (Elıýbaev) alda jaqsy jumys istep, kósh bastap kele jatqan komandaǵa kómektesti. Odan keıin Haoıýı Sý men Gýstav Vang sońǵy 15 shaqyrymdy óte jaqsy ótkizdi. Al Leo (Gonov) pen Gleb (Syrıtsa) tamasha «lıd-aýt» jasap, meni sprıntke qolaıly pozıtsııaǵa shyǵardy, — dedi Malýchellı.
Veloshabandozdyń aıtýynsha, komandanyń taktıkalyq jospary tolyq oryndalǵan.
— Nátıjesinde bári keremet boldy. Biz jeńiske jetip, úshinshi oryn aldyq. Buǵan qosa, men aralyq mejede bonıfıkatsııa upaıyn ıelenip, jalpy esepte kósh bastadym. Alda taǵy úsh kezeń bar. Jeńiske jetý úshin kún saıyn kúresemiz, — dedi ol.
Eki kezeńniń qorytyndysy boıynsha Malýchellı «Taıhý kóli týrynyń» jalpy jikteýinde kósh bastap tur.
Aıta keteıik, osyǵan deıin «Astana» veloshabandozy «Výelta Ispanııanyń» 11-kezeńinde úzdik ondyqqa engen bolatyn.
