«Astana» veloshabandozy «Djıro d’Italııada» úshinshi ret júldeger atandy
ASTANA. KAZINFORM – XDS Astana Team komandasynyń ýrýgvaılyq shabandozy Tomas Sılva «Djıro d’Italııa» kópkúndik velojarysynyń 12-kezeńinde úshinshi oryn aldy.
Uzyndyǵy 175 shaqyrym bolatyn kezeń Imperııa qalasynan bastalyp, Novı-Lıgýre qalasynda aıaqtaldy.
Kezeń jeńimpazy Bahrain Victorious komandasynyń belgııalyq sportshysy Alek Segart atandy. Ol jarystyń sońǵy shaqyrymdarynda sátti serpilis jasap, márege birinshi bolyp jetti.
Ekinshi oryndy Lotto Intermarché komandasynyń ókili Ton Arts ıelendi.
Al Tomas Sılva jeńimpazdan úsh sekýnd keıin kelip, úzdik úshtikti túıindedi.
Jarystan keıin Sılva kezeńniń óte tartysty ótkenin aıtty.
– Bizdiń topta birneshe shabandoz boldy jáne sprıntti men arqyly oınatý keregin túsindik. Alek Segart sońǵy úsh shaqyrymda óte myqty boldy jáne jeńiske jetti. Ony jeńisimen quttyqtaımyn, – dedi Tomas Sılva.
Sondaı-aq ol komandalasy Alberto Bettıolge alǵys aıtyp, onyń ózin márege deıin tıimdi pozıtsııaǵa shyǵaryp bergenin atap ótti.
Aıta keteıik, XDS Astana Team sportshylary bıylǵy «Djıro d’Italııada» joǵary nátıje kórsetip keledi. Buǵan deıin Dıego Ýlıssı de jarystyń 11-kezeńinde úshinshi oryn alǵan bolatyn. Al Davıde Ballerını altynshy kezeńde jeńiske jetken edi.
Tomas Sılva qazirgi «Djıro d’Italııanyń» basty jańalyqtarynyń birine aınaldy. Ol jarystyń ekinshi kezeńinde top jaryp, eki kún boıy kóshbasshynyń qyzǵylt jeıdesin ıelengen.
Sonymen qatar ýrýgvaılyq shabandoz buǵan deıin de besinshi kezeńde úshinshi oryn alyp, júldegerler qataryna engen bolatyn.
