Astana velokomandasynyń kapıtany Nıbalı «Djıro d' Italııa» kópkúndiginiń onynshy kezeńinde úshinshi bolyp keldi
ASTANA. 15 mamyr. QazAqparat - Keshe "Djıro d'Italııa" sýper kópkúndiginiń onynshy kezeńinde qazaqstandyq Astana Pro Team klýbynyń veloshabandozy Vınchentso Nıbalı márege úshinshi bolyp kelip, kóshbasshy jeıdesin saqtap qaldy.
Dúbirli dodanyń alǵashqy taýly kezeńinde birinshi oryndy Sky komandasynyń múshesi Rıgoberto Ýran jeńip aldy. Ýran birinshi sanatty eki taýly bıiktikten turatyn Kordenons pen Altopıano qalalary arasyndaǵy 167 shaqyrymdyq joldy 4 saǵat 37,42 mınýt ishinde baǵyndyrdy. Osy jetistiginiń arqasynda ol jalpy esepte úshinshi orynǵa kóterildi. Ýrannan 20 sekýndqa qalyp qoıǵan AG2R komandasynyń veloshabandozy Karlos Betankýr kómbege ekinshi, al Astana komandasynyń úmiti Nıbalı kezeń jeńimpazyna 31 sekýnd ese jiberip, máre syzyǵyn úshinshi bolyp kesti.
Osylaısha, Nıbalı ózin ókshelep kele jatqan eń basty qarsylastary - Kadel Evans pen Bredlı Ýıggınsti az da bolsa artqa tastady.
