«Astana» velokomandasy jańa quramyn tanystyrady
ASTANA. QazAqparat - 8 jeltoqsanda «Astana» kásipqoı velokomandasynyń jańa quramy tanystyrylady, dep habarlaıdy QazAqparat.
Tanystyrylym barysynda dástúrli túrde «Astana» velokomandasy sportshylarynyń qatysýymen birneshe shara uıymdastyrylady.
Atap aıtqanda, birinshi kezekte veloshabandozdar «MegaSilkWay» oıyn-saýyq ortalyǵynda jankúıerlerimen kezdesý ótkizedi. Shara erkin formatta ótedi. Velokomanda jankúıerleriniń arasynda «Astana» sportshylarymen birge konkýrs uıymdastyrylady.
Osy atalǵan sharalar aıaqtalǵannan keıin velokomandanyń keshki saltanatty tanystyrylymy ótedi. Sharanyń saltanatty bóliginde «Astana» kásipqoı komandasynyń jańa quramy belgili bolmaq.
Esterińizge sala keteıik, «Astana» álemdik kásibı velosport komandalarynyń tizimine kiretin jalǵyz qazaqstandyq sporttyq uıym. Atalǵan komanda álem boıynsha, onyń ishinde Eýropa, Azııa, Soltústik Amerıka jáne Aýstralııada Qazaqstannyń atynan shyǵyp, jeńisterge jetip júr.
Komandanyń qorjynynda Djıro dı Italııa, Týr de Frans, Ispanııa Výeltasy sııaqty úsh grand-týrdaǵy jetistikterin qosa alǵanda 248 jeńis bar. Qurylǵanyna 11 jyl bolǵan komandada álemdegi eń abyroıly grand-týrlarda jeńiske jetken sportshylar óner kórsetken. Olar - Aleksandr Vınokýrov, Alberto Kontador, Lens Armstrong, Vınchentso Nıbalı, Fabıo Arý.
