«Astana» velokomandasy jańa qurammen tolyǵady
ASTANA. QazAqparat - Qazaqstandyq «Astana» velokomandasy «Bahrain-Merida» komandasynyń tájirıbeli ıtalıalyq jarysqa túsýshisi Manýel Boaromen eki jylǵa kelisimge turý jónindegi qujatqa qol qoıdy. Jańa sportshy komandaǵa 2019 jyldyń maýsymynda kelip qosylady, dep habarlaıdy «SPORTINFORM» SAA.
«Manýele Boaronyń jasy 31-de, dara starttaǵy jarystardyń tájirıbeli mamany. Sondaı-aq, taýda júrý qabileti de joǵary. Ol kez kelgen jarystarda ózin-ózi senimdi sezinedi, komandanyń kóshbasshysyna taýda jaqsy kómek kórsetip, jarystaǵy jaýapkershilikti óz moınyna ala alady», delingen klýbtyń baspasóz qyzmetiniń press-relızinde.
Boaro aǵymdaǵy maýsymda «Horvatııa týrynyń» kezeńiniń jeńimpazy atanǵan. Onyń «Danııa týry» (2014), «Sırkýıt Sıklıst Sart» kezeńderindegi jeńisi men Italııa chempıonatynyń jeke jarysyndaǵy eki kúmis medali jaıynda erekshe aıtyp ketýge bolady.
«Men mańsabymdaǵy jańa ári mańyzdy joldy bastaǵaly otyrmyn. Aldaǵy eki jyl boıy «Astana» komandasynyń maıkasynda oıyn kórsetetin bolamyn. Jańa túster, jańa seriktester, jańa jarystar, jańa shaqyrtýlar... Meniń bularǵa kúshim jetip artylady. Men Aleksandr Vınokýrovtyń artqan senimin aqtaý úshin túgel komandaǵa úlgi bolǵym keledi», - dedi Manýele Boaro.
Vınokýrov Manýele Boarony komanda kóshbasshysy úshin keremet kómek kórsete alatyn sportshy retinde sıpattady.
«Ol bizdiń Grand-týrlardaǵy tobymyzdy kúsheıtetinine senemin. Sondaı-aq, Manýele jeke, komandalyq jarystarda da úzdik nátıje kórsete alady. Biz komandalyq jarystardaǵy nátıjelerimizdi jaqsartý úshin barynsha kúshimizdi salatynymyz belgili, sondyqtan bul sportshynyń bizge kómegi tıeri sózsiz. Boaro - myqty maman jáne ony kelesi maýsymda Astananyń quramynda kóre alatynym úshin qýanyshtymyn», - dedi qazaqstandyq klýbtyń bas menedjeri.
