«Astana» velokomandasy qos talantty shabandoz Vınchentso Nıbalımen jáne Alessandro Vanottımen kelesimshart jasady
ASTANA. 3 tamyz. QazAqparat -«Pro Team Astana» velokomandasy 2013-2014 jyldyq maýsymdarynda óz quramyn kúsheıtý maqsatynda álemdik deńgeıdegi jetekshi veloshabandozdar qatarynan sanalatyn Vınchentso Nıbalımen jáne Alessandro Vanottımen kelisimshart jasasty.
Bul týraly qazaqstandyq velokomandanyń baspasóz qyzmetinen habarlandy.
Bul rette Aleksandr Vınokýrov: «Vınchentso men Alessandronyń kelýi bizdiń quramany 2013-2014 jylǵy maýsymǵa aıtarlyqtaı kúsheıtedi. Biz osynaý myqty eki shabandozdy ózimizge tartý úshin kóp kúsh-jiger jumsadyq. Endi, minekı, kelisimshart jasalǵan soń ol týraly qýanyshymyzda barshaǵa jarııalaýǵa asyqpyz. Bul «Pro Team Astana» úshin keremet sát. Bıylǵy jylǵy sáttilikter arqyly biz kelesi jylǵy maýsymdarǵa berik irgetas qalyptastyryp jatyrmyz jáne Vınchentso men Alessandro komandaǵa qatysty kelisimshart jasaýy, sózsiz bizdiń maqsatqa jetýimizdegi mańyzdy qadam bolmaq», - dep atap ótti.
Al komanda menedjeri Djýzeppe Martınellıdiń aıtýynsha, «Pro Team Astana» qataryna talantty sportshylar Vınchentso Nıbalı men Alessandro Vanottıdiń tartylýy 2013-2014 jyldarǵa salmaqty jospar qalyptasa bastaǵanyn bildiredi. «Jańa kelisimshart komandany kúsheıtip, búgingi keremet quramymyzdy odan saıyn jigerlendire, tolyqtyra túsedi. Men komandadaǵy bundaı jańalyqtyń jankúıerlerimizdi shyn qýanta alatyndyǵyna senimdimin», - dedi ol.
