«Astana» velokomandasy 2011 jyly jas sportshylarǵa arqa súıeıtin bolady - D. Martınellı
ASTANA. 15 qarasha. QazAqparat /Jasulan Amanbaıuly/ - «Astana» velokomandasynyń 2011 jylǵy saıasaty jas sportshylarǵa baǵyttalady. Biz dúbirli básekelerde jas sportshylarǵa arqa súıeıtin bolamyz.
Bul týraly búgin Qazaqstanǵa issaparmen kelgen «Astana» velokomandasynyń sport dırektory Djýzeppe Martınellı jýrnalısterge bergen suhbatynda málim etti.
«Komandada 24 jastaǵy Roman Kroıtsıgerdi atap ótýge bolady. Roman óz mansabynda jeńis dámin tatyp kórgen shabandoz. Sondyqtan bizdiń komanda kóshbasshylardyń qatarynda bolady dep esepteımin. Sonymen qatar ujym sapynda ataqty Aleksandr Vınokýrov baryn eskereıik. «Astana» - jeńiske jete alatyn komanda bolyp qalyptasty dep sanaımyn», - dedi D. Martınellı.
Cheh veloshabandozy Roman Kroıtsıgermen qatar, Reseıdiń birneshe márte chempıony Evgenıı Petrov, "Djıro d Italııa-2010" kezeńiniń jeńimpazy horvattyq Robert Kıserlovskı, 2010 jylǵy Estonııa chempıony Tanel Kangert,frantsýz Remı Dı Gregorıo men avstrııalyq Saımon Klark komandamen ekijyldyq kelisimshartqa otyrdy.
D. Martınellı tilshilermen suhbatynda, bıylǵy jylǵy jarys maýsymynyń sońynda komandadan ketken Alberto Kontadorsyz iri týrlarda jeńý qıynǵa soǵatyndyǵyna qaramastan, qazaqstandyq komanda birinshi oryndar úshin báskege túsýge qabileti joǵary bolatyndyǵyn aıtty.
«Alberto Kontadordy satyp alý eń ońaı jol. Al 2011 jyldyń jańa da sátti komandasyn jasaqtap shyǵarý qıynnyń qıyny. Bizde kásibı sportshylar bar, komandanyń maqsaty bekem jáne óziniń strategııasy jolǵa qoıylǵan», - deıdi ıtalıandyq maman.
Onyń aıtýynsha, kelesi jylǵa daıyndyq erteńnen bastalady. Aldaǵy aptada sportshylardyń jattyǵý jıyndary ótpek.
«Astana» jeńisterden qur qalady deıtindermen kelispeımin. Aldaǵy ýaqyttarda da bizdiń komanda bıikten kórinedi», - dep atap kórsetti ol.
