«Astana» velokomandasynyń múshesi Belgııada ótken jarysta úzdik úshtikke endi
ASTANA. KAZINFORM – XDS Astana Team komandasynyń veloshabandozy Maks Kanter Belgııada ótken «Brıýgge týry» birkúndik jarysynda úshinshi oryn aldy. Súıinshi habar velokomandanyń Instagram áleýmettik jelisindegi resmı paraqshasynda jarııalandy.
Bıyl jańa ataýǵa ıe bolyp, baǵyty jańartylǵan belgııalyq birkúndik jarys Brıýgge mańynda 202,9 shaqyrym qashyqtyqta ótti. Jarys jappaı sprıntpen aıaqtalyp, tartysty básekege ulasty.
Qazaqstandyq komandanyń shabandozdary jarys boıy pelotonnyń aldyńǵy qatarynda belsendi jumys istep, jaǵdaıdy baqylaýda ustady. Nátıjesinde barlyǵy jappaı sprıntte sheshilip, Maks Kanter márege úshinshi bolyp jetti. Jarysta Unibet Rose Rockets komandasynyń ókili Dılan Grýnevegen jeńiske jetse, Alpecin-Deceuninck komandasynan Iesper Fılıpsen ekinshi oryn aldy.
Maks Kanterdiń aıtýynsha, jarys bastalǵan sátten márege deıin óte joǵary qarqynmen ótken. Onyń sózinshe, baǵyt boıynda jeldiń áserinen peloton birneshe topqa bólinetin «eshelondar» jıi baıqalǵanymen, negizgi top uzaq ýaqyt bólinbeı, shıelenis saqtalǵan.
— Márege shamamen 20 shaqyrym qalǵanda brýschatkada qulap qaldym. Komanda meni qaıtadan pelotonǵa jetkizý úshin keremet jumys atqardy jáne nátıjemdi saqtap qaldy. Jigittersiz jarysqa qaıta oralyp, sońǵy kezeńde oryn úshin kúresý múmkin bolmas edi. Sońynda pozıtsııamdy sál joǵaltyp aldym, sondyqtan myqtylardyń janynda qalýǵa tyrystym. Aqyry bári jaman bolmady, sprıntim úshinshi orynǵa jetti. Bul brýschatkaly klassıkalardyń sheshýshi kezeńi aldynda jaqsy bastama dep oılaımyn, — dedi Maks Kanter komandanyń baspasóz qyzmetine.
Aıta keteıik, Maks Kanter buǵan deıin de osy maýsymda jetistikke jetken. Ol bedeldi «Parıj-Nıtstsa» jarysynyń ekinshi kezeńinde jeńiske jetken.
Al XDS Astana Team-niń taǵy bir veloshabandozy Garold Tejada Parıj-Nıtstsa kópkúndik jarysynyń segizinshi kezeńinde 3-oryn aldy.
