«Astana» veloklýbynyń basshylyǵy Endı Shlekti komandaǵa tartýdy josparlaýda
ASTANA. Qyrkúıektiń 3-i. QazAqparat /Jasulan Amanbaıuly/ - «Astana» veloklýbynyń basshylyǵy Saxo Bank shabandozy lıýksembýrgtyq Endı Shlekti komandaǵa tartýdy josparlaýda. Bul týraly búgin elordada jýrnalıstermen kezdesken «Samuryq-Qazyna» UÁQ» AQ basshysy Qaırat Kelimbetov málim etti, dep habarlaıdy QazAqparat.
«Eger Shlek bizdiń komandanyń qataryna ótse, «Astana» buryńǵydaı Týr de Frans velokópkúndiginde iri jeńiske úmit arta alady. Eske sala keteıin, 2008-2010 jyldary eýropalyq komanda bolyp tabylmaıtyn «Astana» 4 grand-týrdy jeńip aldy. Eki márte Týr de Frans, Výelta jáne Djıro d'Italııa básekelerin jeńip aldy», deıdi Q. Kelimbetov.
Kelesi jyly Astana sapynda Alberto Kontador bolmasa da, qazaqstandyq komanda ózderine úlken, ambıtsıozdy mindetter qoıyp otyr. Qazirgi ýaqytta komandanyń sapyn kúsheıtý sharalary aıaqtalyp qaldy. Liquigas komandasynyń buryńǵy sportshysy Roman Kroıtsıger «Astana» komandasyna aýysty. Ol «Astanany» iri týrnırlerde jeńiske jeteleıdi degen úmit basym.
«Biz bolashaqta jekeleı esepte Djıro d'Italııa jarysyn, al toptyq esep boıynsha Týr de Fransty jeńip alamyz degen maqsat bar. Ol úshin bizde barlyq múmkindikter jetkilikti», deıdi ol.
Búginderi Výelta kópkúndigine qatysyp otyrǵan astana komandasy keshegi kezeńniń qorytyndylary boıynsha toptyq esepte birinshi orynda tur.
