«Astana» veloklýbynyń bas menedjeri Djýzeppe Martınellıdiń «Výelta» nátıjesine kóńili tolmaıdy
ASTANA. 12 qyrkúıek. QazAqparat - «Astana» veloklýbynyń bas menedjeri Djýzeppe Martınellıdiń «Výelta» nátıjesine kóńili tolmaıdy. Bul týraly ol qazaqstandyq komandanyń resmı saıtynda málim etti.
«Bıylǵy «Výelta» barlyq qyrynan qıyn boldy. Bastapqyda alańdaıtyndaı eshteńe bolǵan joq, bizde kóshbasshy Fredrık Kesıakoff boldy jáne men onyń jalpy klassıfıkatsııada joǵary oryn alatynyna senimdi edim. Alaıda onyń densaýlyǵy syr berdi. Biz keshegi kúngi kezeńde (senbi, 20-kezeń) ekinshi oryn alyp, tamasha aıaqtadyq. Degenmen jasyratyny joq, meniń kóńilim tolǵan joq. Aldymyzda qıyn maýsym tur. Endi men ózimniń atyma túsetin syndy estýge daıynmyn», - deıdi D. Martınellı.
Aıta keteıik, keshe «Výelta» kópkúndigi óz máresine jetti. Onda «Astana» sapynan eń úzdik kórsetkish kórsetken horvatııalyq Robert Kıserlovskı boldy. Ol kóshbasshy - ıspandyq Hýan Hose Kobodan 13 mınýt 27 sekýnd qalys qalyp, bas klassıfıkatsııada 18 oryn aldy. Komandalyq esepte «Astana» klýby 22 komandanyń ishinen 7-shi oryndy ıelendi.
