«Astana» veloklýbynyń ataýy ózgeriske ushyramaq
ASTANA. QazAqparat - Qazaqstan velosport federatsııasynyń prezıdenti Darhan Qaletaev elde velosportty damytý jumystary daǵdarysqa qaramastan jalǵasa beretinin jetkizdi. Ol elordada ótken «Astana» komandasynyń 2016 jylǵy maýsymyna resmı tusaýkeser jıynynda velokomandanyń bıýdjeti týraly da aıtty, dep habarlaıdy alaman.kz.
Federatsııa prezıdenti «Rıo-de-Janeıro Olımpıadasynda medal alý - keler jylǵy basty maqsat» dedi. Budan bólek, Qaletaev álemdik qarjylyq daǵdarys sportqa da áser etip jatqanyn jasyrǵan joq. - «Astana» komandasynyń jyldyq bıýdjeti 18-22 mıllıon eýro bolǵan. Bıyl bul soma qysqarýy múmkin. Qazir kelissózder júrip jatyr. Múmkindik bolsa, jyldyq bıýdjetti 18 mıllıon eýro kóleminde saqtap qalǵymyz keledi, 15 mıllıon eýro da bolýy múmkin. Al «Astana» áıelder komandasy, «Astana-city», «Vino-4-ever», «Astana» velotrek komandasynyń jyldyq bıýdjeti bir mıllıon eýro, - dedi ol. 2015 jyldyń basynda «Astana» komandasy BAÁ eliniń memlekettik kompanııalarymen demeýshilik týraly kelissózder bastaǵan. Qaletaev bul kelisimniń áli naqty sheshilmeı jatqanyn aıtty. - Arabtarmen jumys isteý qıyn. Biz eki kezdesý ótkizdik. Biz komandanyń atyn ózgertýdi qalamaımyz. Al arabtar komandanyń atyn ózgertýdi qalaıdy. «Astana» - Qazaqstan úshin saıası ári ımıdjdik joba. Sondyqtan «Astana» ataýyn basqa ataýǵa aýystyrý múmkin emes. Keıin «Astana» ataýyna taǵy bir atty qosarlap qosý jaǵyn qarastyrdyq. Bul jerde «Astana» ataýy nemese arabtar usynatyn ataýy birinshi jazyla ma?» degen másele týyndady. Endi 20 jeltoqsannan keıin arabtarmen taǵy bir márte kezdesip, bul máseleni taǵy talqylaımyz, - dedi Qaletaev. Qaletaev bıyl «Astana» komandasynyń bıýdjeti qysqarsa da, komanda «Týr-de-Frans» pen «Djıroǵa» baratynyn málim etti. «Astana» komandasyndaǵy ıtalıandyq shabandoz 2015 jyly Grand týrlardyń biri Ispanııadaǵy «Výelta» jarysynda jeńis tuǵyrynan kórindi. Qazaqstandyq velokomanda 2015 jylǵy maýsymda túrli jarystarda barlyǵy 35 ret jeńiske qol jetkizgen.
