Astana úsh halyqaralyq týrıstik uıymǵa múshe boldy
ASTANA. KAZINFORM — Bul týraly Astana qalasynyń Investıtsııalar jáne kásipkerlikti damytý basqarmasy basshysynyń orynbasary Maqsat Jańabaev qalalyq kommýnıkatsııalar qyzmetinde ótken brıfıngte aıtty.
— Mańyzdy jetistikterdiń biri — Astananyń birden úsh halyqaralyq týrıstik uıymnyń quramyna kirýi. Bul qadam elordany halyqaralyq týrıstik naryqta keńinen tanytyp, sheteldik týrıster sanyn arttyrýǵa múmkindik beredi, — dedi Maqsat Jańabaev.
Spıkerdiń sózinshe, bıyl Astana Germanııa, Qytaı jáne Ońtústik Koreıada ótken iri halyqaralyq týrıstik kórmelerge qatysty. Sonymen qatar Máskeýde jáne Reseıdiń shekaralas qalalarynda roýd-shoýlar uıymdastyrylǵan.
— Kezdesýlerdiń nátıjesinde sheteldik seriktestermen 400-den astam kelissóz júrgizildi. Sonyń qorytyndysy boıynsha, týrızm salasyndaǵy uıymdar arasynda yntymaqtastyq týraly kelisimder men kommertsııalyq sharttarǵa qol qoıyldy, — dedi ol.
Maqsat Jańabaevtyń aıtýynsha, elordada týrıstik ınfraqurylymdy damytý jumystary da jalǵasyp jatyr. Qazir qalada 100-den astam týrıstik nysan jumys isteıdi.
— Bıyl Sıngýlıarlyq mýzeıi men Qazaqstan temirjoly tarıhy mýzeıi ashylyp, ekskýrsııalyq baǵyttar keńeıtilgen. Sonymen qatar týrısterge arnalǵan navıgatsııa men servıstik qyzmet kórsetý júıesi de jetildirilip jatyr, — dedi basqarmasy basshysynyń orynbasary.
Budan bólek, onyń sózinshe, Astanada medıtsınalyq týrızmdi damytýǵa da basymdyq berilgen. Osy maqsatta sheteldik mamandar úshin jetekshi klınıkalarǵa tanystyrý týrlary uıymdastyrylyp, elordanyń medıtsınalyq uıymdary halyqaralyq kórmeler men roýd-shoýlarda tanystyrylyp jatyr.
Osyǵan deıin bıyl Astanaǵa qandaı álemdik juldyzdar keletini jóninde jazdyq.
